Nongpoh, Nailur 24: Kum shi bynta ban ïa kyrshan lang na ka bynta ka jingrakhe ka St. Michael’s Higher Secondary School ïa ka jingdap 60 snem (Diamond Jubilee) ka jingïaid lynti ka skul ha ka ban pynphriang ïa ka jingnang jingstad ha ka them Ri Bhoi, ki khynnah skul barim ka St. Michael’s Higher Secondary School, Umsning ha ka lama ka St. Michael’s Higher Secondary School Past Pupil Association ki la pynlong da kawei na ka tamasa ïa kop bad pynirong ba la ai kryteng ‘Autumn Fiesta cum Variety Show’ ha madan ïalehkai phutbol barim ka shnong Umsning ha Ri Bhoi.
Kane ka tamasa ba ar sngi ka la sdang mynta ka sngi Saitjaiñ bad kin pynkut ha ka 26 tarik u Nailur, 2022 ha kaba ïa kane ka tamasa la wan ban plie da u Fr. Pius Shadap, Parish Priest ka Umsning Parish bad la sakhi lang ruh da ka jingdon lang ka Sr. Alphonsa kaba dei ka Head Mistress ka St Michael Higher Secondary School, u Chaiman ka Umsning Town Durbar, u Bah Rocky Kylla, ki rangbah shnong bad kynthup kiwei kiwei ki riew rangbah bad ki nongïalam na ka kynhun ki khynnah skul barim katei ka skul. Ïa ka jingïalang plie la pynïaid da u Bah Nicky Khar-thangmaw, President ka Past Pupil Association katei ka skul. Kumba la pynpaw da u Bah Nicky Kharthangmaw, uba dei u President ka Association, ka daw kaba ki la pynlong ïa kane ka tamasa ïa pynirong ka long shi bynta ban pynmih pisa na ka bynta ban kyrshan ïa ka skul ha kane ka jingrakhe ïa kane ka jingdap 60 snem katei ka skul ka ban long ha ka 29 tarik u Nailur, 2022 ha St. Michael’s Higher Secondary School, Umsning.
Ha kane ka tamasa ïa pynirong ki la don shibun ki jingïalehkai, ki sport and game bad ki dukan bapher bapher kaba long shi bynta ban khring ïa ki paidbah ban ïa wan kyrshan lang bad ki bor pynïaid kitei ki khynnah skul barim ki la pynlong ruh da ki prorkam bapher bapher kaba long shi bynta ruh ban ai rynsan ïa ki khun samla ba don sap na ka thaiñ Ri Bhoi.
