ïoh kurup ki Pulit hapoh saw bnai ïa u drok Heroin, Opium bad Ganja ba shongdor 18.33 klur

Shillong, Nailur, 23: Ka tnat Pulit ka jylla Meghalaya kaba la pynbna thma pyrshah ïa u drok ka la ïai trei shitom ban pynshaai sha ki paidbah ha kylleng ki bynta jong ka sor bad khapsor ban ïakhun pyrshah ïa u drok bad ha kajuh ka por ka tnat Pulit ka la pynlong ka jingkhynra kaba jur ban ïohkem ïa ki snar khaii drok.
U Director General of Police ka jylla u Dr. LR Bishnoi ha ka jingïalang bad ki lad pathai khubor kaba la long ha ka sngi Thohdieng u la ïathuh, dang ha ki ar sngi, tang hapoh East Khasi Hills District, ka tnat Pulit ka la ïoh kurup jin haduh 400 gram u drok heroin, ar tylli ki motor bike, kawei ka kali bad ka pisa kaba kot T. 5.5 lak.
Haba ai jingkheiñ ïa ka jingïoh kurup drok jong ki Pulit ha ki saw bnai kata naduh u bnai Jylliew haduh u Nailur, 2022, ka tnat Pulit ka la ïoh kurup 3.62 kilo u drok heroin, 4500 kilo u Kynja, 150 gram u Opium, 145 bilor ka dawai jyrhoh, 11902 sla ki dawai kuli Amphetamines. Ka dor ha ka iew khaii be-aiñ ïa kine ki jingdih ba sniew ka la long haduh T. 18.33 klur.
“Namarkata, ka tnat Pulit jong ka jylla ka la ïoh kurup ïa u drok uba kot haduh T. 18.33 klur ha kine ki saw bnai. Kane ka dei ka jingïoh kurup kaba heh bad ka jingïaroh ka leit sha baroh ki Pulit jong ka Jylla bad ïa ka kynhun ki Pulit ka Anti-Narcotic Task Force bad kumjuh ruh ïa ka Special Branch kiba ju ïatreilang ban ai jingtip ha ka por kaba biang bad ban pynkhlaiñ ïa ka jingsyntiat,” la ong u DGP.
Ha ïathuh halor ka jingïoh kurup ïa ki kali, u Dr. Bishnoi u la ong, “hapdeng ki saw bnai, ngi la ïoh kurup 31 tylli ki kali rit bad saw tylli ki trok ba la shah tuh bad ngi la ïoh kurup ruh 90 tylli ki Mobile Phones kham bun hi ki dei ki Smart bad Android Phones.”
U DGP u la ïathuh ruh ba ki Pulit ki la ïoh kurup kawei ka suloi bad katto katne ki kuli.
“Ka pisa kaba la ïoh kurup na ki nongkhaïi drok kat haduh mynta ka la kot T. 24.22 lak,” la ïathuh u DGP bad bynrap, “ka tnat Pulit ka la registar 48 tylli ki case bad ïohkem 134 ngut kiba donkti ha kine ki saw bnai baladep ha kaba 125 ngut ki dei ki shynrang bad 9 ngut ki dei ki kynthei”
Na ki 134 ngut kiba donkti, 123 ngut ki dei na ka jylla Meghalaya bad 11 ngut ki dei nabar ka jylla, kata, na ka jylla Assam, Manipur bad Arunachal Pradesh, la ïathuh u DGP bad bynrap, ‘kane ka pyni shai ba ki nongkhaïi drok ki donkti lang bad ki nongkhaïi drok nabar ka jylla. San ngut na kiba donkit ki dei kiba ju donkti bun sien ha kane ka kam. Ki ju ïai mlien ban leh ïa kane ka kam na ka por sha ka por bad ïa kine ngin pynngat mynta hapoh ki kyndon jong ka NDPS Act,” u la ong.
Shuh shuh u la ïathuh ba ka tnat Pulit ka la lap ba na ki 12 tylli ki district jong ka jylla Meghalaya, ka jingkhaii drok ka kham kynrei ha ki phra tylli ki District, kata, ha East Khasi Hills, West Khasi Hills, South West Khasi Hills, South West Khasi Hills, East Jaiñtia bad West Jaiñtia Hills, Ri Bhoi, West Garo Hills bad ka South Garo Hills.
“Na ki 48 tylli ki case, 50% ki dei kiba la register ha East Khasi Hills bad ki case ba kham bun tam ba la rejister ka dei ha West Garo Hill bud sa ka Khliehriat ha East Jaiñtia Hills, Ri Bhoi bad ha West Jaiñtia Hills,” la ïathuh shuh shuh u Dr. Bishnoi.
U la ïathuh ba ki saw tylli ki District ki bym pat register case wat tang kawei ruh hapoh ka NDPS Act ki long ka Eastern West Khasi Hills, ka East Garo Hills, ka North Garo Hills bad South West Garo Hills.
“Khatphra tylli na ki 76 tylli ki Police Stations ki dei kiba la ïoh ban register ki Case hapoh ka NDPS Act. Namarkata ngin kham pynleit jingmut bha ha kine ki 18 tylli ki Thanat ban pynkdiah ïa u budlum jong ki nongkhaïi drok,” la ong u Dr. Bishnoi.
Ha kaba ïadei bad ka jingïoh kurup ïa ki thuk thuk ar shaka, u DGP u la ïathuh ba ha ki saw bnai ba la leit noh, kata, naduh u bnai Jylliew haduh u Nailur, ki Pulit ki la ïoh kurup 141 tylli ki thuk thuk ar shaka bad ïoh kem 61 ngut ki snar nongtuh ba donkti bad register haduh 90 tylli ki case pyrshah ïa ki.
U Dr. Bishnoi u la ïathuh ba ha ka jingkhynra jong ki Pulit pyrshah ïa ki nongtuh thuk thuk ar shaka la lap ba bun ki dei na Tura bad na Shillong.
U la ïathuh ba ha ka miet sngi Palei kaba bteng haduh ka sngi Thohdieng, ki Pulit jong ka East Khasi Hills ki la pynlong ka jingkhynra kaba jur ha ka thaiñ Mawlai bad ha kiwei kiwei ki jaka ba marjan katba ka miet ka dang kynoi thiah ïa ki paidbah ka Sor Shillong
“Ka kynhun jong ngi ka lah ban ïoh kurup haduh 319.17 gram u drok heroin, 14.24 gram u Kynja bad 7 tylli ki Mobile Phones, kawei ka kali Wagon R kaba don ïa u nombar ML04-C-1659 bad ka pisa kaba kot T. 4, 50, 830 lak,” la ïathuh u DGP.
Saw ngut kiba la shah kem, lai ngut ki shynrang bad kawei ka kynthei ki la shah rah sha Mawlai Police Station bad ïa ka Case la register bad pynngat hapoh ka Section 20(b)(ii)(A)/21(c)/25/27/29 jong ka NDPS Act
U DGP u la ïathuh ruh shi sngi shwa kane, ki Pulit jong ka East Khasi Hills ki la pynlong ïa ka jingkhynra pyrshah ïa ki nongkhaïi drok bad ïoh kurup 64 gram u drok heroin, 5 tylli ki Mobile Phone, kawei ka kali bad ka pisa T.10,000 hajar.