La dep aiti sha ka tnad kam pohïing ïa ka kaiphod tohkit pyndonkam u AIG 29 tylli ki kali : DGP

Shillong, Nailur 23 : U Director General of Plice (DGP) u Dr L.R Bishnoi mynta ka Sngi Thohdieng u la ïathuh ba ka tnad pulie ka la dep ban aiti ïa ka kaiphod jingtohkit sha ka tnad kam pohïing halor ka jingpyndonkam bakla jong u Assistant Inspector General of Police (AIG) (A) u G.K Iangrai ïa ki 29 tylli ki kali.
“ Ngi la dep aiti ïa ka jingtohkit ba bniah sha ka tnad kam pohïing bad ka tnad kam pohïing ka la bthah ïa ngi mynta ban ai sa ka ia ki kot ki sla, ki sakhi sabut halor kane ka jingkynnoh” ong u Dr Bishnoi.
U la ong ba wei ba la ai ia kine ki kot ki sla bad ki sakhi sabut, ka sorkar kan sdang ban leh ïa kaba donkam kat kum ka kaiphod.
Haba la kylli hato ka sorkar ka la wengkam ïa utei u AIG na ka bynta shipor arpor, u DGP u la ïathuh em ym pat weng haduh mynta namar ïakane yn sa leh da ka tnad kam pohïing hadien ba ka la ïoh ïa kine ki kot ki sla bad ki sakhi sabut na ka tnad pulit.
Ha ka jingtohkit jongka kynhun ba la khlieh da u IGP (Law and Order) uy M.K Singh la lap ba kine ki 29 tylli ki kali ki don ha kti jong u AIG G.K Iangrai. Kine ki kynthup ïa ka Scorpio ba thymmai, ka Bolero ba thymmai, ar tylli ki Swift ba thymmai, ar tylli ki Bajaj Motor Cycle , kawei ka ka hyundai Verna, 8 tylli ki Bajaj Pulsar bad kiba bun na kine ki kali ki dei ki bym don ki kot ki sla kiba biang bad ki bym pat rejister number plate ruh. Ka kynhun tohkit ka la tohkit bniah ruh ïa 7 ngut ki pulit kiba don bad u AIG A. Kine ki la phla ba ïa kine baroh ki kali la bat beit da u AIG bad la sei ïa ki tang ha ka por ba u hukum ïaki ban leit sei na ka jaka ba pynïeng ïaki.