Ynda ki la dep jubab, ka aiñ kan leh ïa kaba donkam ïa ki pulit halor ka jingiap u bah Cherish

Shillong, Nailur 23 : U Director General of Police (DGP) u Dr L.R Bishnoi u la kular mynta ka sngi ba yn leh kat kum ka aiñ ïa kito ki pulit ophisar bad langrut kiba don ha ka Tactical Team I kiba la leit khynra ïa ka ïing sah u General Secretary ka HNLC bah Cherishterfield Thangkhiew bad uba la khlad noh ha ka jingshah siat, hadien ba ki la dep ban ai ïa ka jubab jingpynshai sha ka sorkar.
Kane ka kynhun Tactical Team I ka la pynlong ka jingkhynra ha ïing sah u bah Cherish ha ka step phyrngap 13 tarik Nailar 2021.
“ Ka jubab jingpynshai kan long na baroh ki ophisar bad langrut kiba ïadon lang ha katei ka kynhun bad hadien ba ki la dep ai ïa kane yn sa leh pat ïa kaba donkam kat kum ka aiñ “ ong u DGP.
ïa kane ka rai la shim da ka sorkar hadien ba ka la ïoh pdiang ïa ka kaiphod jingtohkit na u nongbishar ba la shongthait u Justice T Vaiphei ïa kaba la wanrah ruh hapoh ka ïing dorbar thawaiñ ka jylla.
Kane ka kaiphod ka la pynpaw ba ka jingpynkhreh ïa ka jingkhynra ka long kaba biang hynrei ka rukom pyntreikam pat ka long kaba tlot bad don bun ki jingduna namar ka jingthmu kane ka kynhun ba kyrpang ka long ban leit kem im ïa u bah Thangkhiew.
“ Kumta u Justice T Vaiphei u la pynpaw ha ka kaiphod “ Namar kata ka jinglap jong nga ka long ba kane ka kynhun kaba leit ban khynra ïa ka ïing u bah Cherish ha ka 13 tarik Nailar 2021 ha ka por 3 baje mynstep ka dei kaba la pyndonkam palat bun ki bor pulit kaba la wanrah ka jingiap jongu” ong ka kaiphod.
Nalor kata la pynpaw ruh ha ka kaiphod ba ka jingleit khynra ka long kaba kyrkieh bad kaba kulmar bad leh tieng da ka Tactical Team -I. Ha ka jingshisha la dei ban kem im ïa u ym ban siat iap.