Lap ka jingtohkit ki Pulit bym treikam shuh ki CCTV ha Jowai District Jail

Shillong, Nailur, 23: Ka tnat Pulit kaba la pynlong ïa ka jingtohkit ha Jowai District Jail hadien ka jinglait phet jong ki san ngut ki runar bad uwei u koidi ha ka 10 tarik mynta u bnai ki la lap ba ki CCTV ba la pyndait ha kane ka Phatok kim shym la treikam satia.
Kum ban shu pynkynmaw, san ngut ki runar kiba dang don hapdeng ka jingshah tian bishar kiba kynthup ïa u I Love You Talang, u Ramesh Dkhar, u Marsanki Tariang, u Lodestar Tang, u Shidorki Dkhar bad u Rikmenlang Lamare.
U I Love You Talang, u Marsanki Tariang, u Lodestar Tang, u Shidorki Dkhar ki la shah bom ïap ha ki paidbhur ha ka sngi kaba bud ha ki paidbhur ha ka khlaw kaba don ha u pud jong ka shnong Muthlong bad Shangpung.
Ïa u Ramesh Dkhar bad ïa u Rikmenlang Lamare la ïohkem noh da ki paidbah kiba la aiti noh sha ki Pulit.
U Director General of Police ka Jylla u Dr. LR Bishnoi ha ka jingïakren bad ki lad pathai khubor ha ka sngi Thohdieng u la ïathuh ba ïa u Ramesh Dkhar la pynkynriah mynta sha Williamnagar District Jail.
Ha kaba ïadei bad jingshah bom ïap jong ki saw ngut ki runar ba lait phet na Phatok ha ka ka khlaw kaba don ha u pud jong ka shnong Shangpung bad Muthlong, u DGP u la ïathuh ba ki Pulit ki la ujor suo motu case pyrshah ïa ki paidbhur kiba donkti.
“Ban lap ïa ki jingshisha, nga la phah ïa ka kynhun ki Ophisar ban leit jurip ïa ka Phatok bad ha ka jingtohkit ki la lap ba bun na ki CCTV ki dei ki bym treikam shuh bad ngi la pynkhlaiñ ïa ki Pulit ban pahara khnang ba ki jaka baroh yn pahara miet la bad sngi,” u la ong.
“Ngi la ai jingmut ïa ki bor ba dei peit jong ka Phatok ban pyndait katto katne ki bording ha ki jaka ba kham kongsan. Ngi la lap ruh ba ka don ka jingïasylla hapdeng ki nongtrei ka Phatok bad mar mar ki Pulit tang shu ïoh sabut ki la kem noh ïa ki saw ngut ki nongtrei jong ka Phatok bad phah ïa ki sha ka Judicial Custody,” la ïathuh u Dr. Bishnoi.
Katkum ka jingïathuh jong u DGP, kane ka jinglait phet jong ki koidi na phatok ka dang don hapdeng ka jingtohkit.
“Nga la kyrpad ïa u Inspector General of Prisons ban leit jurip ïa baroh ki Phatok bad ban peit kiei ki jingdonkam ban pyrkhing hapoh ka Phatok. Ïa ka kaiphod un sa phah shen bad hadien kata, ngin sa shong lang ban shim ïa ka rai,’ la ïathuh u Dr. Bishnoi.
Haba pyntip ba ka tnat Pulit ka la phah ïa ka jingtyrwa sha ka Sorkar ban thied 80 tylli ki thuk thuk ar shah ban pahara ha ki surok ka nongbah Shillong, u Dr Bishnoi u la ong, “ki don katto katne ki jaka ba donkam ban pyndait ïa ki CCTV bad ban pynkhlaiñ ïa ka jingpahara ki Pulit. U Myntri Rangbah ka Jylla u Conrad K. Sangma u la mynjur ban ai 80 tylli ki thuk thuk khnang ba ki Pulit kin dup lah ban ïaid pahara da kine ki thuk thuk ar shaka ha ki surok ka nongbah Shillong.
U la ïathuh ruh ba ka tnat Pulit ka la ïasyllok ruh bad ki bor synshar shnong kiba la kdew ïa ki jingbym shngaiñ ha ka shnong ka thaw jong ki.
“Ka jingeh watla don makna ki CCTV ruh ka dei namarba ym don ki nongpeit bad ïa ki CCTV ym shym la peit da ka tnat Pulit. Ngi lah ban pan jingïarap na ki briew kiba tbit kumno ban pynïaid ïa ki CCTV bad ban maramot ruh lada donkam.” u la ong.