Da ka mynsiem kaba shlur : Pyllait im u samla na ka jingngam jyllop ïa uwei u Rangbah

Jowai, Nailur 21: Uwei u samla naka shnong Mukhla Mission ïa uba la tip kyrteng kum u Beholden Dkhar, uba dei ruh u khun ba ar napdeng ki 7 ngut shi para jong ka kong Tilda Dkhar bad u ma P. Lamare (Kpa), da ka jingshlur khlem da don shuh ka jingsheptieng ula lah ban pyllait im ïa uwei u rangbah briew uba jan ngam jyllop ha kawei ka pung dohkha kaba don haka shnong Moosdai kaba dang hap hapoh ka Mukhla West Jaiñtia Hills District.
Utei u samla haba kren ha u nongthoh khubor u Mawphor ula ïathuh ba utei u Rangbah briew ula hap hapoh katei ka pung haka 3 tarik mynta u bnai Nailur 2022 ha ka por kumba 2 shiteng nohphai sngi, ‘katba u dang ksaid naka jingngam jyllop hapdeng jong ka pung mar mar u samla Beholden Dkhar u noh phum ban leit tan ïa utei u rangbah sharud jong ka pung’.
Ki paidbah ba bun kiba don ha kata ka por kila sdang ban ïarap lang ïa utei u rangbah bym pat tip kyrteng, ynda la wan pynpoi ïa u sharud ka pung da u Beholden bad ki paidbah kila ïarap ban khñiot ïa ka um na kpoh haduh ba utei u briew ula lait im na ka jingngam jyllop.
Shuh shuh u samla Beholden Dkhar ula ïathuh ba kane ka la jia hashwa ban kut jong ka jingïakop khwai hynrei kiba bun na ki paidbah ba don ha katei ka jaka kim shem la nud ban leit ïarap ïa utei u briew namar ka jingjylliew jong ka pung bad utei u briew ula poi ruh sha ki bynta ba kham shapdeng jong ka pung.
“Ha ka por ba nga dang pyllang ïa ki tiar khwai nga la ïohi ïa kane‘hangta hi ka por la wan ka jingpasiew bad da ka jingshlur ngam bymse ban noh beit ha ka pung tang ban ïoh leit pynllait im ïa utei u rangbah bad kaba kmen ka long ba nga la lah ban tan da kaba suk ïa utei u rangbah bad hadien ba ki paidbah kiba don lang ha katei ka jaka kila sdang ban ïarap lang nangta nga ka mih noh na katei ka jaka” ong u Samla Beholden Dkhar.
“La ïathuh ruh ba utei u rangbah briew ba ka kham tymmen uba la hap shapoh pung ka lah ban dei na ka daw ba u shoh khawyiang da ka jingthum ban leit sha ka jingïakop khwai dohkha ha katei ka pung”.
Halor kane ka kam shlur jong utei u samla ka seng Khasi Jaiñtia National Union (KJNU) hapoh ka jingïalam u President ma Niman N Shadap ha ryngkat ka jingdonlang ki nongïalam ka Chdoh Ri Jaiñtia Maya (CRJM) bad ka Hynñiewtrep New Generation Movement kila pynlong ka jingpynkup burom ïa utei u samla mynta ka sngi ha ka jingïalang ba lyngkot kaba la long ha Highwinds Restaurant hajan ka pung Thadlaskeiñ.
Na ka liang u ma Niman Shadap ula ong ba kane ka jingpynkup burom ïa u samla Beholden Dkhar ka long shi bynta ban ai mynsiem ïa u halor kane ka kam ba shlur jong u ban pynlait im ïa ka mynsiem jong utei u Rangbah briew bad kyrmen ba kane ka khubor kan poi sha utei u rangbah.
Ula ong ruh kane ka kam shlur jong u samla Beholden Dkhar ka long ruh kum ka lad ban ai mynsiem ïa kiwei de dei halor kane ka kam shlur jong u bad ha ka juh ka por ka long ruh kaba sngew sarong ba une u samla ula leh ïa kane ka kam hakhmat jong kiba bun kiba shakhi da ki spah ngut.
U ma Shadap u ong kaba sngewkmen ka long ba ki dang don kum kine ki samla hapoh ka Ri-Lum Jaiñtia kiba shlur bad leh ïa kane ka kam ba bha, ngi buh ka jingduwai ïa une u samla ba um dang ïoh ka met kaba koit ba khiah bad kitbik kitrwiang ba un dang ïoh ïa ka mynsiem sngewrit bad ka jingstad jingshemphang ha ka jingim ma manla ka sngi.