Mawkyrwat, ‘Nailur, 21: Ka Kur Lai Kynja Ksanmaw (KLKK), Rangblang, South West Khasi Hill District da ka dap da ka jinglyngngoh bad pyrshah jur ïa ka jingwan thung mawpud jong ka ophis ba dei peit ïa ki surok ne ka Public Work Department (PWD) Roads khlem da don kano kano ka jingpynshai ïa ka Kur lyngba ki kot ki sla kiba biang.
Halor kane ka bynta na ka liang ka Kur Lai Kynja Ksanmaw, Rangblang ha ka Dorkhas ba ki la phah hapoh ka ophis jong ka Deputy Commissioner, South West Khasi Hills District ki la pyntip ba ki pyrshah halor ka jingleh jong ka ophis Public Work Department (PWD) Roads namar da ki phew snem ba ka surok kaba dei ïaid lyngba ka khyndew jng ka Kur Lai jait jong ki kaba sdang naduh Wah Ponnailo ter ter shaduh markhap bad ka khyndew Shnong Marïem ba ka tnad PWD (R) kam kam pat wan ban pyn-i-dak ïa ka jinglongtrai jong ka lyngba ki mawpud ne maw pillar. Shuh shuh la ong ruh ba ki jingpynshisha lyngba ki kot ki sla ba haduh katno phut ba ka ophis PWD ka la dei siew ïa ka compensation.
Ha kajuh ka por ki la ïathuh ruh ba na ka liang ka Kur Lai Kynja kaba la ïashong ha ka 19 tarik u ‘Nailur, 2022 ka la sngewdei ban kyrpad ba dei ban pynsangeh noh shwa ïa kane ka jingpyntrei ban thung ïa ki mawpud tad haduh ban da ïa pynbeit lang da ki ar liang mamla.
Ka Kur Lai Kynja da kaba shai kdar kam don kano kano ka jingpyrshah ïa ka jingpyrtrei ïa ka surok Intermediate hynrei ka sngewban kyntu ïa ka ophis PWD (R) ba ka dei ban bthah ïa ka kompani ba kan kham pynstet ïa kane ka jingtrei khnang ba ki paidbah jong ka dong ka thaiñ kim nym don ka jingthut ha ka leit ka wan kaba manla ka sngi.
Shuh shuh la ong ruh ba ka Kur Lai Kynja Ksanmaw jong ka Rangblang ha ryngkat ka jingïadonlang u Lyngdoh Kur bad Secretary jong ka Kur, ki longkmie bad ki samla ryngkat ki katto katne na ki Sordar Shnong ban leit ïa kynduh ïa ka Deputy Commissioner, South West Khasi Hills District halor ka jingwan thung mawpud ne pillar jong ka ophis PWD (Roads) Sub Division Mawsaw kaba khlem da pyntip ïa ki Rangbah Kur bad kumjuh ruh ïa ki Rangbah Shnong ha ka por ba ka ophis PWD ka wan ban thew ïa ka surok kaba sdang naduh Wah Ponnailo haduh markhap jong ka shnong Marïem.
Kaba lyngngoh ka long ba ha ki katto katne ki jaka la ïohi pynban ïa ki mawpud (pillar) ba a wan thung da ki kontraktor ha kaba kane ka la wanrah ha ka umdum ïa ki Rangbah Kur, ki longkmie longkpa, ki samla bad kumjuh ruh wat ïa ki Rangbah Shnong. Namarkata, dei halor kane ka nongrim ba ki Rangbah Kur ki la leit hapoh ka ophis jong ka Deputy Commissioner, South West Khasi Hills District ha ka 20 tarik u ‘Nailur, 2022 ban leit ïa kynduh ïa ka ryngkat ka dorkhas ban dawa ba ka ophis PWD (Roads) ka dei ban pynsangeh shwa ha kaba ïa dei bad ka jingthung mawpud hapoh jong ka khyndew jong ka Kur Lai Kynja Ksanmaw.
Kumta ha kane ka jingleit ban ïa kynduh ki la ïoh lad ban ïa kren bad ka Additional Deputy Commissioner, South West Khasi Hills District ban pynsnge halor kitei ki mat namar ka jingkwah jong ka Kur Lai Kynja ka long la kumno kumno ka ophis jong ka PWD (Roads), Mawkyrwat ka dei ban pyni shwa ïa ki kot ki sla kiba biang ha shwa ban wan thung ïa u mawpud. Shuh shuh ki la pynpaw ruh ka jinglyngngoh ba balei yn wan thung mawpud bad balei ki khlem thung naduh kito ki por ba mynshwa naduh ki snem 1971 ba ka ophis PWD (Roads) ka la dep siew ïa ka land compensation sha ka khyndew jong ka Kur.
Kane ka long katkum ka kyrwoh khubor ba la phah da u bah Klominik Iawphniaw, Lyngdoh Kur Lai Kynja Ksanmaw bad na u bah Moding Thyrniang, Secretary Kur Lai Kynja Ksanmaw.
