Shillong, Nailur, 18: Ki don haduh 103 tylli ki projek kiba sahteng ha ka jylla kat haduh ka 31 tarik Lber 2021.
ïa kane la lap da ka jingtohkit Comptroller and Auditor General of India (CAG) kat kum ka kaiphod ba ka la pynpaw na ka bynta u snem 2021. ïa kane ka kaiphod CAG la wanrah hapoh Assembly da u Myntri Rangbah ka jylla ha ka Sngi Thohdieng.
Na kine ki 103 tylli kiba sahteng, 41 tylli ki dei kiba la buh por ban pyndep hapoh ka 31 tarik Lber 2021 bad 62 tylli ki dei kiba la dei ban pyndep kumba 10 snem mynshwa hynrei haduh mynta ym pat lah ban pyndep.
Ka pisa ba la mang na ka bynta kine ki projek ka la kot sha ka 2825.48 klur.
Ka kaiphod ka pynpaw ba ka pisa kaba la pynlut ha kine ki 103 ki projek ka la kot sha ka 841.85 klur. Na kine ki projek kumba 12 tylli ki dei kiba dang pyndep tang 20 %, 29 tylli kumba 21 haduh 50 %, 61 tylli kumba 51 haduh 98 %. ïa kine ki projek la pyntreikam da ka tnad PWD. 24.50 % haduh 60 % ki dei ki projek kat kum ka Swachh Bharat Mission . 24.50 % ki dei ki paiñkhana ïing briew, ba 60 % ki dei ki paiñkhana paidbah. ïa kine pat la pyntreikam da ka tnad PHE.
Kumta la ïohi ba ka don ka jingpynslem ïaki projek na kaba dei ban pyndep ha ka shisnem sha ka 10 snem bad kane ym dei tang ba slem ka kam hynrei kiew ruh sa ki dor ki mur jongk i tiar ki tar.
