Dawa ka HYC, South West ïa ka Ïingdorbar Thaw-aiñ ban wanrah da ka Official Resolution
Ban pynkut noh syndon ïa ka jingthmu tih Uranium ka UCIL
Mawkyrwat, ‘Nailur, 12: Ka Hynñiewtrep Youths Council (HYC) jong ka South West Khasi Hills District ka dap da ka jingsngewkhia ban ïohi ba ka sorkar India lyngba ka UCIL ka dang ïai don ka jingthmu ban tih ïa u uranium napoh ka South West Khasi Hills District. Ka seng ka pynrem jur ïa ka sorkar India bad ïa ka UCIL kiba watla ki paidbah ka Jylla ki la pynpaw ïa ka jingpyrshah ban tih ïa u uranium hynrei ka sorkar India ha ryngkat ka UCIL pat ki dang thmu beit ban tih ïa u. Kane ka jingleh bym suid ñiew ka UCIL bad ka sorkar India ka wan rah ïa ka jingshong syier, ka pynklumar jingmut ïa ki paidbah ka dong ka thaiñ, ka buh ruh ïa ki paidbah ha ka jingma bad ka long ka jingthom bor ïa ka rai laitluid ki paidbah ka thaiñ.
Ka HYC, South West Khasi Hills ka pynpaw shai ba ka seng ha ryngkat ki paidbah da lei lei ruh em kin nym ailad ïa ka sorkar India bad ïa ka UCIL ba kin wan jubor ban tih ïa u uranium hapoh ka Jylla.
Ka Seng ka la ïohi ha ki khubor ba ki MLA ka South West Khasi Hills District kata u bah Renikton Lyngdoh Tongkhar bad u bah Pius Marweiñ ki la pynpaw ba ki pyrshah ïa ka jingthmu tih ïa u uranium hapoh ka distrik. “Ngi sngewkmen ba ki la pynpaw ïa ka sur u paidbah jong ka distrik hynrei tang ban pynpaw ha ki khubor kam pat biang, ngi pynkynmaw biang kumba ngi la ai jingthoh ha kine ki por ba la dep ban dawa na kine ki MLA baroh ar ngut bad ïa baroh ki MLA ka Jylla ba ki dei ban rah syndon da ka Official Resolution (OR) ha ïing Dorbar Thaw-aiñ katba ka Dorbar Synrai ka dang ïaid mynta, ba baroh ki MLA ka Jylla Meghalaya kiba pyrshah tih ïa u uranium kin rai da kawei ka sur ban dawa na ka sorkar India ba kin sangeh noh mardor ïa ka jingthmu ban tih ïa u ha ka Jylla bad ba kin khang kyrdep noh syndon ïa baroh ki ophis UCIL ha ka Jylla Meghalaya”, ong ka kyrwoh na u President.
Ka HYC South West Khasi Hills District ka ai jingmut ruh ïa ka KHADC khamtam ïa ki MDC ka South West Khasi Hills District ba kin wanrah da kajuh ka resolution ha ïing Dorbar Thaw-aiñ ka KHADC khang ba ka jingpyrshah tih ïa u mawpoh khyndew kan nang skhem shuh shuh. Kane ka long katkum ka kyrwoh khubor na u bah Arbok Kharjahrin, President ka HYC, South West Khasi Hills District.