Shillong, Nailur, 11: Ka AITC, Meghalaya lyngba tnad jong ki samla pule ne Meghalya Pradesh Trinamool Congress Student Union(MPTCSU) ha ka sngi Palei ki la pynlong ïa ka jingïakhih da kaba shong shah thngan ha syndah ka ophis jong ka MPSC ban dawa ba ka thung kam thungjam ha ka jylla ka dei ban long kaba shai bad ruh ba ka sorkar jylla ka dei ban shim khia ban kyntiew ïa ka pule puthi ha ka jylla.
Haba kren sha ki lad pathai khubor u President ka MPTCSU u Samla Bansharailang Pyngrope u la ong ba ka jingwan shong shah thngan ki samla pule ka ong ban dawa ba ka thungkam thungjam ha ka jylla kan ong da ka kynti kaba shai.
“Dang shen ngi ïohi ba u Myntri Rangbah ka jylla u ïathuh ba ki kam kiba lait ha ka tnat pulit ki don kumba 2000 eiei, hynrei kham ha dien sa u Myntri ka tnat Poh Ïing u la ong pat ba ki lait tang 8,00 tylli nga shu kwah ban kylli balei ka kham duna na kaba kam u Myntri Rangbah hato ka dei ba ki la thung kam rieh ne balei” u la buh jingkylli.
“Dang shen ki samla ba ïakhun ïa ka eksamin ban ïoh rung kam pulit ki la ïakhih ban dawa na ka sorkar ba dei ban pynbna ïa ka resol namar ka sorkar ka khot pynlong eksamin khlem pynbna resol haduh mynta” u la o ng.
U la ong ruh ha ka jingshisha ka sorkar ka dei ban pyndap noh wat ïa ki kam ba lait namar kiba bun ki samla kiba a pyndep ïa ki jingpule bapher bapher kim shym la ïoh kam satia.
Haba ïadei bad ka pule puthi u Samla Bansharailang u la ong ba ka pule puthi kaba ka jylla ka ai ka dei kaba bna kylleng sawdong hynrei u la ong ba shen ka jylla kan bna noh kum ka pdeng ki kam khalai.
“U Myntri Rangbah ka jylla u la ong ruh ba ki samla pule ka jylla ba kim donkam satia ban thoh ïa ka CUET ban bteng ïa ki jingpule ba shakhmat, don ki samla pule kiba sngew shngaiñ ba kim donkam shuh ban ïakhun ïa kane ka eksamin hynrei ki tip ba lada kwah bteng jingpule kum ha NEHU ki donkam ïakhun ïa kane ka eksamin ynda la dier ka por hato ka sorkar kan kit khlieh mo ïa kane ka jingïalam bakla u Myntri Rangbah” u la ong.
