Ïathir ka DHS West Khasi Hills halor ki lad jingïarap sha ki paidbah, ka shongkha khynnah ka long beaiñ: DC Nongstoiñ

Nongstoiñ, Nailur, 12: Ki dkhot jong ka District Health Society West Khasi Hills ki la ïa shong jingïalang mynta ka sngi ka 12 tarik Nailur, kaba long ruh ka sien ba nyngkong bad U Deputy Commissioner ka West Khasi Hills District u Bah Garod L.S.N Dykes, ha ryngkat ka jingïadonlang u EAC ka Mawshynrut bad u BDO Nongstoiñ, ha conference hall Dc ophis Nongstoiñ.
Ki mat ïatai ha kane ka jingïalang ki long ki program ka koit ka khïah ba la pyntreikam hapoh kane ka thaiñ ki long kumne MCH, National Vector Borne Diseases Control Programme, Community Processes, Pradhan Mantri Matru Vandana Yojana (PMMVY), Comprehensive primary health care programme, National Progamme for control of Diabetes, Cancer and Stroke (NPCDCS), Rashitriya Balswasthya Karyakram (RBSK), Rashritya Kishore Swasthya Karyakram, IDSP, NTEP, NLCP, NTCP, NOHP, NPPCD, UDID, JSSK, CM Motherhood scheme, POCSO bad kiwei kiwei.
Ha ka jingkren pynwai u Deputy Commissioner u la pynpaw ka jingsngewkhia halor ka jingsahdien bad ki jingeh, ba ka tnad ka koit ka khiah ka ïakynduh ban pyntreikam ïa kitei ki program, u la ong, ba kane ka wan jïa na ka daw ba ki paidbah kim pat pei phang ïa ki jingthmu.
Kumta u la kyntu ïa ki office triekam ka sorkar ban pynlong programme khah khah, ban ai jingpynshai paidbah khamtam ha ki jaka nongkyndong. Ha kaba ïa dei bad ka jingïashongkha khynnah, u Deputy Commissioner u la kdew ba ka kynthei hapoh ka 18 snem karta bad 21 snem u shynrang kim pat lah ban ïa poi kha, namar kane ka long kaba beaiñ. Ïa ka Pocso Act dei ban ai jingpynshai paidbah ban ïada na jingleh pyrshah, u la pynkut.