Pyrshah jur ka Seng Kur Kharsahnoh ïaka jingshah pynïap u para kur

Jowai, Nailur 09: Ka Seng Kur Kharsahnoh Central Body mynta ka sngi kala pynlong ïa ka jingïalang jong ki para kur na kylleng ki jaka kaba la long ha Ummulong West Jaiñtia Hills District, ban pynpaw ka jingpyrshah jur halor ka jingshah rah bor bad shah pynïap u para kur u (L) Fullmoon Kharsahnoh uba dei na ka shnong Larnai West Jaiñtia Hills District.
Ïa kane ka jingïalang la pynïaid da u bah S. Kharsahnoh uba dei ruh u President ka kur, ha shwa kane la pynlong ïa ka jingsngap jar ba shipor kum ka dak ka jingburom ïa u para kur ula khlad bad la ïoh ruh ka jingkren na ki nongïalam ba hakhmat jong ka kur naduh ki Unit bapher bapher kiba hap hapoh ka Ri Khasi bad Jaiñtia.
Ka Seng Kur ka dap da ka jingsngewkhia halor kane ka jingjia bad ka pynpaw ruh ka jingsngew kyndit bad jingsngewsih kaba khraw haba la ïoh jingtip ba uwei na ki para kur ula shah rahbor bad shah pynïap syndon ha ki riew thrang snam, ha kaba ki runar kila rong tuh ruh ïa ka kali ba u ñiah ka (Tourist Taxi) Swift Dzire kaba don u Registration No: ML04 D 1113.
Ha kane ka jingïalang mynta ka sngi da kawei ka sur kila rai ban buh ka jingkyrpad sha ki bor sorkar ba kan pynïoh ïa ka hok halor kane ka jingshah pynïap dusmon jong u (L) Fullmoon Kharsahnoh.
Kaba nyngkong ka kur ka pynpaw ka jingpyrshah kaba jur hakhmat ki bor District bad ha khmat ki nongsynshar jong ka sorkar jylla halor ka jingshah rahbor bad shah pynïap jong u para kur. Kaba ar ka seng kur ka buh ka jingkyrpad ïa ki bor sorkar ban ai ka jingbishar kaba hok na ka bynta ka ïing ka sem jong u (L) Fullmoon Kharsahnoh bad ban pyndep ïa ka jingtohkit bad ai ka jingpynshitom katkum ki bor ka aiñ ïa kiba donkti ha kane ka jingjia.
Kaba lai ka seng kur ka kyrpad ïa ki bor pulit bad kumjuh ïa ka sookar jylla ba kan thaw ki lad jingïada na ka bynta ki nongñiah kali kamai, Jowai-Shillong bad ïa kiwei de khnang ba kum kine ki jingïa pyntriem kim ym ïoh ban suh thied bad ha ka juh ka por kan long ka jingsngaiñ ïa ki paidbah nongleit nongwan.
Ha kane ka jingïalang la rai ban phah ïa kane ka jingthoh sha u Deputy Commissioner ka West Jaiñtia Hills District u bah Batlang S. Sohliya, IAS halor kane ka jingshah pynïap dusmon u (L) Fullmoon Kharsahnoh bad ka jingkyrpad na ki bor sorkar ban pynshitom tyngeh ïa kiba donkti katkum ki kyndon aiñ bad ban pynïoh ïa ka jingbishar kaba hok na ka bynta kiba ha ïing ha sem jong u (L) Fullmoon Kharsahnoh.
Ïa kane ka jingthoh la phah kopi sha u myntri kam pohïing ka jylla, sha u Secretary ka tnad pulit, sha u Director of Police ka jylla bad sha u Superintendent of Police ka West Jaiñtia Hills.