Nongstoiñ, Nailur 9: Katba nang mih ki sngi ka All India Trinamool Congress Nongstoiñ Block Committee, ka la nang suh thied bad ïoh mynsiem shuh shuh ha man la ki shnong, da ka jingwan rung dkhot jong ki paitbah nongshong shnong, ban ai ka jingkyrshan ba pura ïa katei ka party ha ka election ban wan kata ha u 2023.
Dang ha kane ka taiew u bah Macmillan Kharbani ryngkat ki nongïalam jong ka party, ki la leit sha ka shnong Mawrublei kaba don ha ki thaiñ Sangriang, ban pynlong ïa ka jingïalang bad ban pynrung kyrteng ïa ki dkhot bad ki nongkitkam jong ka party ha katei ka shnong.
Ha katei ka jingïalang kumba phra phew ngut ki rangbah kiba dei ki nongïalam ba hakhmat jong ka NPP, Congress bad HSPDP ki la leit ban pynïasoh sha katei ka party bad ki la kular ruh ba kin trei shitom ban pynjop ïa u bah M.Kharbani ha ka election ban wan.
Ha katei ka jingïalang la ïoh ïa ka jingpynshai halor ki mat treikam jong ka party ha kaba ki paitbah ki la ïa shah skhor bha. U bah Kharbani haba pynshai halor ki mat treikam jong ka party, u la ong ba ka jingthmu ba kongsan eh ba ka party ka don ka long ban trei na ka bynta ka jingmyntoi jong ki paitbah nongshong shnong hapoh ka ri.
Nangta ban ïada kyrpang ïa ka hok long trai jong ki jaitbynriew rit pait kiba la shah khñiot beiñ ha baroh ki liang. U la ong ruh ba ka AITC ka don ruh ïa ka thong ba baroh ki jait niam ha ka ri ki dei ban long laitluid bad kim dei ban shah lehbeiñ kumba ka long ha kine ki snem.
U bah Kharbani u la pynshai shuh shuh ba kumba ka long ha kine ki snem, ki paitbah nongshong shnong ka jylla Meghlaya ka la mad ïa shibun ki jingeh la ka long ha ka ïoh ka kot, ka kamai kajih, ka pule puthi hynrei ka sorkar kam shym lah satia ban ïarap ïa ki paitbah.
U la ong ba ka jingshah ktah jong ki paitbah na ka jingkiew dor jong ki mar ki mata, ka long ka bym lah shuh ban ong, ka jinghiar ka ïoh ka kot ka la ktah naduh ki nongbylla haduh ki nongkhaïi, hynrei ka AITC ka la buh ïa ka thong ban weng ïa kitei ki jingeh.
Ha katei ka sngi la pynrung kyrteng ruh ïa ki rangbah, ki longkmie bad ki samla kiba la wan ban pynïasoh sha ka party bad la pynskem da u bah Macmillan Kharbani President ka AITC Nongstoiñ Block Committee.
