Subroto Cup : Shiteng dorjon pynbam ka RC Evening Secondary School ïa ka Maharashtra

Shillong, Nailur 07 : Ka RC Evening Secondary School, Mihmyntdu, Jowai kaba mihkhmat ïa ka jylla Meghalaya ka la sdang ka jingïaid lynti da kaba khur jingjop ha ka lympung ïalehkai Subroto Mukherjee Cup 2022 na ka kyrdan ïalehkai U-14 (boys).
Ha katei ka jingïalehkai, u Richanmi O Lyngdoh u la khyrwit hat-trick katba ïa ka shi kol la thep da u Givenson Suting lyngba ka penalty.
Haba phai sha ka jingïalehkai hapdeng kitei ki ar tylli ki skul, ka RC Evening ka la lah shisha ban ïalehkai bha naduh ka rukom pynshat bad pashat bol ha kaba ki khlem da ailad satia ïa ka kynhun pyrshah ban pynkhih jar. Naduh kaba sdang ka la ïakhun tyngeh bad haduh kaba kut ka la lah ban khanglad ïa ki jingpyrshang thep kol ka Maharashtra ha kaba ka la lah ban pynliem syndon da 4-0 kol.
Ka RC Evening Secondary School kan pynkhreh pat ban aireng pyrshah ïa ka skul na Gujarat mynta ka sngi Palei ha ka por 3 baje janmiet. Ka RC Evening SS kaba mihkhmat ïa ka jylla Meghalaya ka don ha ka Pool C ha ryngkat ka skul na Maharashtra bad ka Gujarat.
Kum ban pynkynmaw hangne ba katei ka lympung ïalehkai 61st Subroto Mukherjee Cup kaba la pynïaid da ka Subroto Mukherjee Sports Education Society (SMSES) ha ryngkat ka Indian Air Forces ka la ju pynlong hadien ar snem kum ka dak ka jingsdang ki lympung ïalehkai na bynta ki skul ha kylleng ka ri India.
Ïa katei ka lympung ba mynta u snem la plie pyrda da u Air Marshal K. Anantharaman, VSM, Air Officer-in-Charge Administration uba dei ruh u Vice Chairman, SMSES.
La donlang ruh ki nongkhur takma ha ka Commonwealth Games 2022 ha ka ïakop rah nar ba kynthup u Vikas Thakur bad Gururaja Poojary, 2022 lem bad kiwei kiwei ki nongïalam ba hakhmat jong ka SMSES.
Ha katei ka sngi sdang ka Govt Model HSS Chandigarh bad ka NCC kiba la ïakhaid khlem don ba lah ban thep kol.