Jowai, Nailur 07 : Ka 7 Wasa ka la pynliem da 4-0 kol ïa ka Sohmynting ha ka lympung ïalehkai ‘U Kiang Nangbah Memorial Trophy’ Super Division Football Tournament-2022 bala pynïaid da ka West Jaiñtia District Sports Association (WJDSA), kaba la long mynta ka sngi ha madan Kiang Nangbah Stadium Dongmihsngi, Jowai. Ïa kitei ki saw kol na ka 7 Wasa la thep da u Dashngain Sukhlaiñ ar kol ha ka minit ba 1 bad 15, u Burom Salahe ha ka minit ba 58 bad u Dreamson Suchiang ha ka minit ba 72.
Katkum ka Points Table ba la ïoh lum na u Football Secretary ka WJDSA ka kynhun ïalehkai jong ka 7 Wasa kala wan ba nyngkong eh da kababa ïoh khur haduh 15 point bad kala jop ha baroh 5 tylli ki jingïakhun. Ka Ladthadlaboh SC kala wan ba ar da kaba khur 10 point kaba la jop 3 sien, shah rem shisien bad ïakhaid shisien.
Ka Mynthong SYAC Club ka la wan ba lai bad ïoh 7 point, na ki 5 tylli ki jingïakhun kala jop 2 sien, shah rem ar sien bad ïakhait shisien. Ka Nangbah Mulang SC na ki saw sien ki jingïakhun kala kur 7 point bad kala wan ha ka kyrdan ba saw da kaba jop 2 sien, ïakhiad shisien bad shah rem shisien. Ka kynhun jong ka Khimusniang kala wan ba 5 da kaba khur 7 point, kala jop ar sien, ïakhaid shi sien bad shah rem ar sien. Ka Lumïawmusiang Shangpung SC kala wan ba Hynriew napdeng ki 4 sien ki jingïakhun kala jop shisien, ïakhaid shisien bad shahrem ar sien.
Ka Sohmynting SC kala wan ha ka kyrdan ba hynñiew, hadien ba ka la rem laisien bad ïakhaid arsien bad khur 2 poiñ. Katba ka Sabahmuswang SC kala wan ba khadduh (phra) bad khur tang shi point, na ki 5 tylli ki jingïakhun kala shah rem haduh saw sien bad ïakhaid shisien.
