Shillong, Nailur 07 : Kum shi bynta ban pynkhlaiñ ka jingïadei paralok hapdeng ki ar tylli ki ri kata ka ri India bad Bangladesh ki shipai ïada khapud jong ka ri India ki Border Security Force (BSF) bad Border Guard Bangladesh (BGB) ha ka sngi Balang ki la pynlong ka jingïalehkai paralok da ka jingïalehkai volleyball.
Katei ka jingïalehkai paralok ka long ruh shi bynta ka jingrakhe ka ri India ïa ka “Azadi ka Amrit Mahotsav’’, ha kaba ïa ka jingïalehkai la pynlong ha jan ka outpost jong ki BSF kaba don ha Bahadur jong ka South Garo Hills.
Ka jingïalehkai hapdeng kitei ki ar tylli ki tnad shipai ïada khappud ka la long kaba itynnad ha kaba ki la ïalehkai naduh ka mynsiem kaba kmen. Ha katei ka jingïalehkai hapdeng ka jingsakhi lang da baroh ar tylli ki kynhun shipai, ka BSF ka la jop da kaba pynliem da 3-0. Ki la don haduh kumba 500 ngut ki paidbah nongshong shnong jong katei ka thaiñ kiba la wan ban sakhi ïa ka jingïalehkai jong kitei ki ar tylli ki kynhun. Katkum ka kyrwoh khubor na ki BSF la ïathuh ba ki paidbah nong shong shnong ki la pynpaw ka jingsngewkmen bad ïaroh ïa baroh ar ki tnad shipai ka BSF bad BGB kaba la pynlong ïa kaa kum katei ka jingïalehkai kaban pynkhlaiñ ruh ka jingïadei paralok hapdeng ki shnong khappud .
Ha katei ka sngi la don lang ruh u Sh. Inderjit Singh Rana, IG BSF Meghalaya uba la pynpaw ba lyngba katei ka jingïalehkai kan nang pynïajan hapdeng ki ar tylli bad khamtam eh ban don ka shongsuk shong shngaiñ ki shnong khappud bad hapdeng ki BSF bad BGB.
