Haduh kamra thiah u PM nga kloi ban leit pan skhim ïa ka Mawsynram Constituency : Sanbor

Shillong, Nailur 06 : Kum shi bynta ban kyntiew ïa ka ïoh ka kot ki paidbah, ka sorkar jylla , ka tnad Animal Husbandry and Veterinary ka la bteng ban sam da ki khun sñiang sha ki longïing kiba duk ha ki shnong nongkyndong lyngba ka skhim Rural Backyard Piggery Scheme jong ka National Livestock Mission. Lyngba kane kajuh ka skhim, u Bah Sanbor Shullai MLA uba dei ruh u Myntri ba dei peit ïa ka tnad Husbandry and Veterinary ha ka sngi ba ar u la hiar hi da lade ha Mawsynram bad ha Dangar ban sam ïa ki khun sñiang sha ki 600 tam ki longïing kiba duk.
Ha katei ka jingïalang sam khun sñiang ha Mawsynram bad Dangar, la donlang ruh u MLA ka thaiñ Bah Himalaya M Shangpliang kum u Symbud Kongsan, Dr. Manjunatha C, Secretary AH and Veterinary Department, u GHP Raju Principal Secretary AH and Veterinary Department, ki ophisar jong ka tnad AH and Veterinary, Rangbah Shnong ka Shnong Mawsynram, ki riew rangbah, longkmie longkpa bad ki samla.
Haba kren ha katei ka jingïalang u Bah Sanbor u la ong ba u don ka jingsngewjan na bynta ka Mawsynram Constituency bad u long ba la kloi ban leit ïakren markhmat haduh kamra thiah u Myntri Rangbah duh ka ri u Narendra Modi ban pynleit jingmut kyrpang na ka bynta ban wanrah ïa ki skhim bapher bapher hapoh Mawsynram.
U la ai ruh ka jingïaroh ïa u MLA ka Mawsynram uba lah ban wan ban ïa syllok na ka bynta ban ai jingïaarap da ki skhim bapher bapher sha ki paidbah ka Mawsynram bad u la pyntip ruh ba nalor kane skhim un sa pynïoh ruh de sa da kiwei ki skhim na ka tnad Art & Culture ban pynïoh direct na Delhi ban shna ïa ki ïing shnong bad kumjuh ruh ka Insurance ba 5 lak na ka bynta ki paidbah haba ki don hapdeng ka jingeh.
U la pyntip ruh ba nalor ka jingsam ïa ki khun sñiang shen yn sa sam ruh sa ki blang bad ki syiar lyngba katei kajuh ka skhim bad kyntu ïa ki paidbah ba kin sumar bad pynroi ïa ki khnang ba kan long ka jingmyntoi na bynta jong ki hi. U la ïaroh ruh ïa u Myntri Rangbah duh ka ri u Narendra Modi uba la theh ki kam pynroi na bynta kiba duk ba suk lyngba ki skhim kiba pher bapher ba ki paidbah kim pat ju ïoh ha ki snem ba lah leit noh.
U Bah HM Shangpliang haba kren kum u Symbud Kongsan u la ong ba ka kam ri jingri kam dei ban long tang kum ka kam ban shu pyndep rukom hynrei u la kyntu ïa ki paidbah ba ki dei ban aiti lut da ka mynsiem khnang ba kan long ka jingkyrkhu bad kyntiew ruh ha ka ïoh ka kot. U la ai ruh ka jingïaroh ïa u Bah Sanbor Shullai uba la trei shitom kaba la pynlong ïa ki paidbah ban ïoh ki jingmyntoi lyngba katei ka skhim.