Ka Town Vending Committee kan teh lakam ïa ka jingkhapngiah na ki nongdie madan: Shane Thabah

Shillong, Nailur 06: Hadien ba ka Deputy Commissioner jong ka East Khasi Hills ka la pynmih ïa ka hukum ba na ka liang ka ophis jong ka kan hiar ban leit sorjamin ïa ki jaka ba shong die madan khnang ban pynkylluid ïa ki katto katne ki jaka kiba la khapngiah palat da kaba pynkynriah ïa ki katto ktne kiba ki nongdie madan bad ba ïa ka kaiphot na ka liang ki ophisar ba ka la thung la kumno kumno ha ka 30 tarik Nailar na ka liang u Mawphor u la pyrshang ban bud dien ïa kane ka kam na ki katto katne ki nongdie madan ban kylli kaei kaba ki ophisar ki bthah ha kaba ïadei bad kane.
Haba kren bad u General Secretary ka Meghalaya and Greater Shillomg Progressive Hawkers And Street Vendors Association u Bah Shane Thabah u la ong ba ka jingpynbna jong ka DC ka dei ban leit sorjamin ïa ki katto katne ki jaka ba shong ki nongdie madan kiba a jur than ka jingkhapngiah khnang ban pynkynriah sha kiwei pat ki jaka ban pynkylluid ïa ka leit ka wan u paidbah, hynrei kat haduh mynta kim pat lah ban pyndep ia kane ka sorjamin u la ong.
Kat kum ka jingïathuh jong u Bah Shane ba ki jaka kiba kham palat ka jingkhapngiah ki dei ha ki thaiñ Laitumkhrah ha shiynter ka surok naduh Police Point haduh syndah ka ïew Shyllong.
haba kylli pat ïa ki jaka kiba ki opisar ki la wan sorjamin u la ong ba ïa mynta ki lah dep ban leit sorjamin tang ïa katto katne tylli ki jaka, kum ha Khyndailad, Motphran bad IGP.
“Na ka liang ka DC ka la shim ïa ka synjam ban leit jurip lang bad ngi ïa kino ki jaka kiba ïohi khapngiah palat, bad ban pynkynriah noh ïa ki sha kiwei pat ki jaka, hynrei ym dei ba ong ban weng noh shisyndon ïa ki,” u la bynrap.
Haba ïadei bad kine ki lad kiba ka DC ka la shim la kin pynkylluid ne em ïa ka sor u Bah Shane u ong ba katba ym pat lah ban thaw ïa ka Town Vending Committee, ka jingdie madan ka dang ïai long kumjuh. U la ong ba tang ka Town Vending Committee kaba lah ban pynbeit ïa ki kynrum kynram baroh, “Tang ka aiñ hi kaba lah ban pynbha ïa kiei kiei baroh, namar ïa kaba mynta ki ïashong die jingdie kulmar, uba trei da kiwei pat ki jait kam ruh u wan shong die madan lane u ai bylla bad dei na kane ka daw ba shu mih khlem ithuh ithaw shuh ki nongdie madan kaba wanrah pat ïa ka jingkhapngiah,” u la ong.
U la ong ba ka shong ha ka sorkar ba kan pynkloi ban thaw noh ïa ka Town Vending Committee lem kumta kan ïai sah kumjuh bad ka jingkhapngiah kan ïai neh beit.
Kumban shu kdew ka DC dang ha kine ki khynndiat taïew ka la pynmih ki jingpynbna ba ki katto katne ki ophisar kin hiar sha ki jaka die madan ban sorjamin bad ba ia kaiphot yn aiti sha ka la kumno kumno 30 tarik Nailar.