Shillong, Nailur, 06: “Ban sngap ïa u paidbah bad kiei ki jingeh kaba u ïakynduh ka dei ka thong ba kum ka party ngi buh ha ka jinbgïaid kjat ba 3,000 KM ha ki 150 sngi kaba la tip kum ka Bharat Jodo Yatra kaban sdang naduh ka 7 tarik na Kanyakumari ka bynta ba don ha tduh eh jong ka ri India bad ban ïaid ter ter lyngba ki 12 tylli ki jylla bad 2 tyli ki Union Territories bad pynkut ha Jamu and Kashmir” ong ka Babeeta Sharma ka nongai ktien ka Congress ha ka jingkren bad ki lad pathai khubor.
Ka Babeeta Sharma ka la ong ba kane ka jingïaid kjat kan don 118 ki nngtrei ka party kiban ïaid naduh ba sdang tad haduh ban da pyndep katba kiwei kiwei pat na ki jylla bapher bapher kin lah ban ïaid kjat lang kat kum ka jingsngew kotbor jong ki. Ka la ïathuh ba ka rai jong ka Congress ban ïaid kjat kaba haduh 3,000 KM ka long ban wanrah ïa ka jingïatylli ban ïakhun lang da kawei ka sur pyrshah ïa ka jingïoh lum spah ba tang da ki katto katne, ka jingpyrshang ban pharia ïa ka jinglong ba tylli ka ri bad ka jingpyrshang ban knieh ïa ka hok jong ki nongshong shnong ka ri.
“Lada phi peit ka ïoh ka kot ki paidbah ka hiar katba nang mih ki sngi katba ki paralok heh spah u Modi pat ki nang lum spah man ka sngi, ka ïohkam ïohjam kaba shyrkhei. Mynba ki dang don ha ka liang pyrshah ki kynthah ba ka sorkar Congress kam lah ban tehlakam ïa ka jingkiewdor ki marbam bad ka umphniang balei mynta ynda ki la don ha ka bor kim leh eiei. Ka umphniang kali kam ju kiew dor kumba jia mynta balei ka sorkar kaba don ha ka bor kaba kam ba kan pynhiar dor kam leh eiei. Lada phi peit ka ïohkam ïohjam kaba jur kaba ym ju jia koit kaba kum kane” ka la ong.
“Phin phai sha ka jinglong tylli ka ri ka sorkar BJP ka pyrshang ban pharia da kaba pynïashun hapdeng kiwei ki jait jingngeit niam bad kiwei pat, kiwei ki jait bynriew bad kiwei pat namar kim kwah ba u paidbah un ym don por ban pyrkhat ïa ka ïoh ka kot hynrei ba un bunkam ban ïashun hapdeng para nong India da ki buit sianti ka sorkar BJP’ ka la bynrap
“Man ka sngi phin ïohi ba ka hok ki nong shong shnong ka ri kaba la ai bad kdew hapoh ka Riti Synshar ka ri, ka sorkar ka pyrshang ban knieh noh bad ka don ruh ka jingkput saiñ pyrthei ïa ki nongïalam saiñ pyrthei na ka liang pyrshah da kaba ki pyndonkam ïa ki tnat treikam laitluid kum ka CBI bad ka ED kine keiñ ki daw ba ngi kum ka party ryngkat ka jingkyrshan lang kiwei ki seng treimon sngewbha ba ngi mih sha khmat” ong ka Babeeta Sharma.
Ka la ong ba ïa kane ka jingïaid kjat yn ïalam da u Rahul Gandhi naduh kaba sdang haduh ban pyndep.
