Shillong, Nailur 06 : U Bah Sanbor Shullai MLA ka BJP na South Shillong uba dei ruh u Myntri jong ka tnad AH and Veterinary u la ong ba u Bah HM Shangpliang un dei u kyrtong ka party BJP na Mawsynram Constituency ban ïakhun ïa ka ilekshon MLA kaban sa long ha u 2023.
U Bah Sanbor haba ïakren bad ki nongthoh khubor ha ka sngi ba ar u la ong ba ki paidbah baroh ki lah tip ba ka BJP ha Mawsynram ka lah don u MLA ba mynta u Bah HM Shangpliang. “Ngin thok shuh sa ïa kaei haba ka pyrthei ka lah tip lut ba ka BJP ha Mawsynram ka la don ïa u kyrtong uba dei ruh u MLA ba mynta u Bah HM Shangpliang ban ïakhun ïa ka ilekshon MLA ha u 2023” ong u Bah Sanbor.
U Bah Sanbor u la pynpaw ruh ka jingsngewskhem ba ha Mawsynram ka BJP ka don ka jingkyrmen ban ïoh kheit ïa u soh ba thiang da kaba pynkynmaw ruh ha ka jingïakhun ïa ka ilekshon MP ha kaba u la ïoh 4 hajar vote na katei ka constituency watla u khlem leit ban ïalap ilekshon.
“Watla nga khlem wan ban iukjat hangne (Mawsynram) ban ïakynduh ïa ki paidbah ban ïalap ilekshon hynrei nga la ïoh haduh 4 hajar vote tam ha ka ilekshon MP bad kane kadei ka jingïohi jngai jong ki paidbah ïa ka jingtreikam jong ka party BJP hapoh ka jingïalam u Myntri Rangbah duh ka Ri u Narendra Modi,” la ong u Bah Sanbor.
U la ong ruh ba shen ka party kan sa pynduh noh ïa ka BJP Mawsynram Mandal kaba rim bad ban thaw thymmai noh khnang ban pynkhlaiñ ïa ka party hadien ba ki nongïalam ba hakhmat jong u Bah HM Shangpliang ki la mih noh na ka party TMC bad pynïasoh dang shen sha ka BJP ha Nongbah Shillong ha ryngkat lang ruh bad ki nongkitkam kiba rim.
Shuh shuh ha kaba ïadei bad ka party BJP u la ong ruh ba ym tang ha Mawsynram hynrei ki paidbah ha ka thaiñ shatei lam mihngi ka ri ki la sdang ban sngewthuh bad kim ngeit shuh ïa ka jingshah kren shah kynthoh ka party BJP. “Ha ka thaiñ shatei lam mihngi ka ri India kum ha Assam, Manipur, Nagaland bad kiwei ki paidbah ki la sdang ban sngewthuh bad kim pdiang shuh ïa ka jingkren pyrshah ïa ka BJP hynrei ki sngewthuh ba kadei tang ka buit politik tang ha ka por ilekshon,” la ong u Bah Sanbor.
