Shillong, Nailur 6 : U heh ka Trinamool Congress (TMC) uba dei ruh u nongpathai khubor jongka u Saket Gokhale ula ujor shaka Lokayukta ban thung ïaka jingtohkit ba laitluid halor ki jingkynnoh bamsap ha kaba ïadei bad ka jingthied kali bad pyndonkam bakla ïa ki 29 tylli ki kali da u AIG (A) bah G.K Iangrai.
Ha ka jingujor sha u Chairperson jongka Lokayukta u bah Bhalang Dhar u Goghale u la ong “ Donkam ban thung ïaka jingtohkit ba laitluid da ka Lokayukta halor kine ki kam bamsap bad ban pynshitom kat kum ka aiñ ïa kiba ïadonkti ha kane ka kam”.
U la ong ka daw ba la rai ban ujor sha ka Lokayukta ka long hadien ba la ïohi ha ki lad pathai khubor ba ka kloi ban thung jingtohkit halor kane ka kam lada don kiba ujor namar kat kum ka aiñ jongka Lokayukta kam lah ban shimti hi ban tohkit khlem kano kano ka jingujor.
Kat kum ki jinglap jongka Committee ba la tohkit halor ki kam bamsap ha ka tnad pule, ki don haduh 29 tylli ki kali kiba la thied da ka Police Head Quarter kiba la shu pyndonkam da u AIG (A) bad kiba bun ki dei kiba ym don number plate. Ki kali ki dei da ki model ba kham tad dor katba ki invoice ne ki receipt pat ki dei k iba rem dor bad ïa kine la thied da u AIG G.K Iangrai, ong ka jingujor u Ghokale.
ïa ka umphniang ruh la theh beit na ka tnad pulit bad ïa ki coupon la ai beit da u bah Iangrai hi.
U Ghokale u la ong ba wat hadien ba ka Committee ba la khlieh da u Addl. Inspector General of Police (IGP) u Mukesh Kumar Singh ka la ai ïa ka kaiphod sha u DGP ka jylla hynrei haduh mynta ym pat leh ei ei ne sospon ïa une u pulit ophisar.
U la kynnoh ruh ba ka jingbym shim khia jongka sorkar ban leh ei ei halor ka kaiphod ka pynpaw ba ka don ka jingthmu ban shu pynjah rngai bad buhrieh ïa kine ki kam bamsap da ki myntri sorkar bad ki heh sorkar jylla. Nalor kata ula ong ba u Myntri Rangbah lei lei u la dep kren shai hi ruh ba ïa kane ka jingpyndonkam bakla ïaki kali ym lah ban ong ba ka dei ka scam ne ka jingbamsap ba shyrkhei.
