Shillong, Nailur, 06: Ka kynhun jong ki nongtrei kontrak hapoh ka tnat PWD (R) kiba don hapoh ka shatri jong ka Ri Bhoi Progressive Workers Union (RBPWU) ha ka sngi Baar ki la dawa ïa ka Sorkar Jylla ba ka dei ban pyntreikam noh ïa ki kyndon jong ka ‘Meghalaya Regular Casual Workers Scheme 1996.’
U President jong ka RBPWU u Bah Napoleon Mawphniang ha ka jingkren bad ki lad pathai khubor u la ong, ki mat ba ki nongtrei kontrak ka tnat PWD (R) na Ri Bhoi District ki la thoh sha ki bor Sorkar ka long ban pyntreikam ïa ka ‘Provident Found,’ namar kumba ka long mynta ki dap da ka jingsngewdiaw ba ïa ka skhim EPF ym shym la pyntreikam satia.
Ïa ka EPF la pyntreikam tang da ki tnad treikam jong ka Sorkar Pdeng bad ki kompeni jong ki riewshimet kiba don hapoh ka jylla hynrei ki ophis Sorkar jong ka jylla kim shym la pyntreikam satia ïa kane ka skhim.
