Hadien ka jingïakren ïasuk, mynjur ka Russia ban sangeh noh ka jinghiar thma hajan Kiev

Istanbul, Lber, 29: (SocialNews.XYZ): Ka Russia ka la mynjur ban pynduna noh ïa ka jinghiar thma jong ki shipai hajan ka nongbah Kiev bad ha nongbah Chernigov hadien ba ka jingïakren ïasuk bad ka Ukraine ka la poi sha ka jingïasngewthuh jingmut, la pynbna u Deputy Minister of Defense u Alexander Fomin ha ka sngi Baar.
Haba kren sha ki lad pathai khubor hadien ka jingïakren bad ka kynhun kaba mihkhmat ïa ka ri Ukraine, u Fomin u la ong, “la rai ban pynduna noh ïa ka jingdon jong ki shipai ha ki bynta ban rung sha ka nongbah Kiev bad Chernigov.”
“Ngi khmihlynti ba ïa kane ka rai yn sa shim ruh ha Kiev bad ïa ki kyndon na ka bynta kane ka rai yn sa pynbna,” u la ong.
U Fomin u la kyntu ïa ka Ukraine “ban bud pyrkhing ïa ki kyndon jong ka Geneva Conventions, kaba kynthup ha kaba ïadei bad ki shipai kiba la shah kem ha ka thma.”
Ïa ki jingtip kiba kham bniah yn sa pynbna da u General Staff jong ka Russia hadien ka jingwan phai jong ka kynhun ïakren ïasuk jong ka ri Russia na Istanbul, ha kaba ka jingïakren kan sa long ruh ha nongbah Moscow.
Ha kane ka jingïakren kaba la long ha nongbah Istanbul, ki arliang mamla ki la ïakren ruh halor ka jingïasoi ïa ka soskular ban ailad ïa ka shongsuk shongsaiñ na ka bynta ka ri Ukraine, ban sangeh ïasiat bad halor ki hok longbriew manbriew ha Ukraine.
U Adviser jong ka ophis u President ka Ukraine u Mykhailo Podoliak ha kane ka jingïakren ha Turkey u la ong, “ka jingïakren ka la long halor kiba bun ki mat. Kawei na ki mat bakongsan ka long ban ailad ïa ka shongsuk shongsaiñ ba kan wan phai ha ka ri Ukraine. Dei tang lyngba kane ka soskular ngin sa lah ban pynkut noh ïa kane ka thma ha Ukraine. Kawei pat ka mat ka dei ka jingmynjur ban sangeh ïasiat khnang ban ailad ïa ki nongshong ba kin lait na kino kino ki jingmynsaw.”
“Mynta ka jingeh kaba mih ka nang kynton shuh shuh, ka jingeh na ka jingpynjur ïa ka thma, ka jingisih, ka jingpynkheiñ ïa ki kyndon pyndonkam ïa ki tiar thma ym tang ha ki madan thma,” ong u Podoliak.
Ka tnat shipai jong ka ri Ukraine kan pynthikna ba ki shipai ba la shah kem ha kane ka thma kin ym ngat ha ka jingshah pynkheiñ ki hok longbriew bad la khmih lynti ruh ba ka Russia kan bud ïa kane kajuh ka lynti.