Ka ‘Sngap Syiem College’ kan sa dei noh ka Community College hapoh u Naiwieng: Dy. CM

Mawkyrwat, ‘Nailur 04: U Symbud Myntri Rangbah jong ka Jylla Meghalaya, bah Prestone Tynsong ha ka sngi saitjaiñ jong ka taïew ka sngi ka 03 tarik u ‘Nailur, 2022 haba kren u kum u kongsan ha ka jingïalang ban pynkup burom ïa ki samla pule ne ka Graduation Day 2022 ha Sngap Syiem College, Mawkyrwat u la ai ka jingpynbna ba kane ka kolej kan sa dei noh kawei na ki ‘Community/People’s College’ ha shwa ban kut u bnai Naiwieng (November), jong mynta u snem.
Ha kane ka jingpynbna paidbah jong u Symbud Myntri Rangbah ka jylla la sakhi lang da ka jingïadonlang jong ki dkhot ka Governing Body jong ka Sngap Syiem College, Mawkyrwat, u Principal jong ka Sngap Syiem College, Mawkyrwat, ki nonghikai, ki samla pule lem bad ki kmie ki kpa jong ki samla pule ha kaba ïa ka jingïalang la pynlong ha phyllaw jong kane hi ka kolej.
U bah Prestone Tynsong, Symbud Myntri Rangbah jong ka Jylla Meghalaya haba kren shuh shuh ha kane ka sngi u la ong ba kum ka dak jong ka jingpynsah jingkynmaw ïa ka jylla Meghalaya ha ka jingdap 50 jong ka, ha kaba ïa dei bad ka South West Khasi Hills District na ka liang ki ophisar jong ka Planning lyngba ka tnad pla tyngka ryngkat ka sorkar ki la ïa rai ba shwa ban kut u bnai ‘Naiwieng jong mynta u snem kin sa ai ïa kawei ka ‘Kot Jingthoh’ ne ‘Notification’ kaba kyrpang ha kane ka distrik ba ka “Sngap Syiem College” kan dei noh ka “Community College” ne “People’s College” bad kyrmen ba dang ka jinglah ban pynurlong ïa kane kan sa long ka jingmyntoi bad ka jingsuk na ka bynta ki kmie ki kpa bad kan long ruh ka jingshngaiñ ha ka ïaid ha ka ïeng bad kyrpang ha ka longbriew ka manbriew ba ki khun ki kti kin bteng ïa ki jingpule.
Namarkata, u la pynpaw ba kum ki longkmie ki longkpa kiba phah ïa ki khun jong ki ban pule ha kane ka Sngap Syiem College, Mawkyrwat, kane ka dei ka sien kaba nyngkong ïa u ba un wan ïuh kjat ha kane ka kolej ha kaba u la ïohi ïa ka jingiphuh iphieng bad i don burom jong kane ka jaka kaba ki ong ka “Temple of Education” ne “Ka shlem ai jinghikai”. U la ong ba ki kmie ki kpa ki dei ban ïashimkhia lem ban sneng ban kyntu ïa ki khun ki kti jong ki namar haba ki leit ha kum kine ki jaka ban ïoh ki jinghikai ha ka jingnang ka jingstad ki donkam ruh ka jingkyrshan ba rad-bah na ïing na sem.
Haba kren kyntu ïa ki samla pule kiba la pyndep ïa ki jingpule na kane ka kolej, u la ong ba ki don ki khun samla kiba sngewba haba ki la pass ïa ka ‘degree’ bad ïoh ïa ki syrnod, ki ong ba ka la biang, hynrei kaei kaba u bah Prestone Tynsong u don ban ong, ka long “ba tang katne kam pat biang pynban ki dei ban peit shuh shuh ha u lum uba kham shajrong”. U la pynkynmaw ruh ba wat ai ba ka jingduk kan long ka daw na ka bynta ka jingthmu ba bha jong ki khun samla ban kiew ha ki kyrdan kiba kham hajrong ha ka liang ka pule puthi namar kumba hapoh kane ka kolej la ai lad ba ki bym lah ban siew ïa ka bai klas ruh kin lah ban wan bad ai lad ruh ïa ki ba kin siew katba ki lah ei.
U bah Prestone Tynsong u la ïathuh shuh shuh ba ha kaba ïa dei bad ka pule puthi, na ka liang ka sorkar ka la dep ba mang haduh T. 7000 klur tyngka, hynrei kane ka ruh kam pat da biang pura na ka bynta ki jingdonkam bad ka dang ïa donkam. “Naduh Primary Level haduh ki College Level ka mang pisa kam duna ïa ka T. 4000 klur tyngka shi snem, ha kaba na ka liang ka sorkar lyngba ka tnad pule puthi ka hap ban pynlut”, ong u bah Prestone.
Ha kaba ïa dei bad ka jingpynsngew jong u Principal jong ka Sngap Syiem College halor ka surok ban leit sha ka kolej ba thymmai ka ban sa shna shen, u bah Prestone Tynsong u la ong ba un sa shimkhia ban leh ïa kaba donkam ban pyndep ïa ka surok bad kumjuh ruh ïa ka Detail Project Report (DRP) na ka bynta ka jingtei ïa ka ïing kaba thymmai jong kane ka kolej. “Na ka liang ka sorkar kan sa bud dien halor kine kiei kiei baroh khnang ba ka jingthmu kan jia long khnang ba kumba u la dep ban pynsngew ai ba kane ka shlem jingai jinghikai kaba ki kyrshan hi, pynlut hi bad ruh kaba ki leh hi kan long kawei na ki jaka pule kaba bha tam hapoh jong ka South West Khasi Hills District.
Kum ka dak jong ka jingai mynsiem na ka bynta ki samla pule kiba la wan shakhmat ha ki jingpule, na ka liang ka kolej ka la ïoh ban pynkup burom ïa ki 150 ngut ki samla pule kiba la ïoh ba pyndep ïa ka Degree bad kumjuh ruh ïa ki ar ngut ki samla pule kiba la wan shakhmat ha ka HSSLC bad ha ka Degree kata sha ka samla Ibansara Iawphniaw (HSSLC) da ka K. Dhirendro Academic Achievement Award bad sha u samla Aiborlang Syiemlieh (Degree) da ka Rowell Academic Achievement Award.
Kiwei pat kiba la ai jingkren bad ai mynsiem ki long na ka kong J.U. Kharpuri, Additional District Magistrate, South West Khasi Hills District, u Rev. Dr. S.I. Iawphniaw, Vice President jong ka Governing Body, Dr. K.K. Nongsiej, Principal, Sngap Syiem College, Mawkyrwat ha kaba ïa ka jingïalang la pynïaid da ka kong C. Syiemlieh, nonghikai Political Science, bad ka jingkren khublei na u bah S. Kharwanniang, Vice Principal, Sngap Syiem College, Mawkyrwat.
Ïa kane ka sngi la pynshit pynshngaiñ da ka jingrwai na ki samla pule jong ka 5th Semister, ka jingshad na ka Alumni Association bad ka jingrwai ïa ka College Anthem.