Shillong, Lber 29 : Ka Committee ba tohkit halor ki kynrum kynram bad jingkynnoh bamsap ha ka Meghalaya Energy Corporation Limited (MeECL) hapoh ka jingïalam u Nongbishar ba la shongthait u Justict R.N Mishra ka la aiti mynta ka sngi ha Delhi ïa ka kaiphod jingtohkit sha u Myntri Rangbah, u Conrad K Sangma.
Hadien ba ka Committee ka la shimti ban tohkit ka la tohkit naduh ki records jongka ophis, ka la tohkit na ki nongtrei jong ka MeECL jong ki tnad trei kam bapher bapher jongka kompani pynmih bording ka jylla. Hadien kane ka la pynkhreh ïa ka kaiphod ryngkat ki jingai jingmut ïa ka sorkar kiei kiba ka dei ban leh hadien ba ka committee ka la pyndep ïa ka jingtohkit.
ïa kane ka Committee la thung naduh ka 29 tarik u Naitung 2021 bad la aiti ba kan tohkit halor ki jingbuh record hapoh ka MeECL, kumno ka jingïoh bad jingduh nong, kumno la pynïaid ïa ka MeECL bad kumjuh ruh halor ki rukom treikam ki lai tylli ki tnad jongka kata ka Meghalaya Power Generation Corporation Ltd (MePGCL) Meghalaya Power Transmission Corporation Ltd (MePTCL) bad ka Meghalaya Power Distribution Corporation Ltd (MePDCL).
