Shillong, Lber 29 : Ka Shnong Mawpun, Umlyngka kadei kawei na ki dong kiba don ha Umlyngka kaba kynduh jingeh bha mynta la palat phew snem haba ïadei bad ka umbam umdih bad khamtam lei lei ha ka leit ka wan na ka daw ka jingbym biang ki lynti ki syngkien.
Na ka liang u Rangbah Dong, Bah T Buhroi haba pynpaw ïa katei ka jingeh ba ka shnong ka kynduh u la ong ba u sngew kumban jaw ummat haba u ïohi ïa ki khynnah skul bapli tang na ka jingsied ktieh ha por ba ki ïaid lynti ki la hap ban leit phai noh sha iing.
“Ha kine ki phew snem ngi la im ha ka jingkordit na ka jingsniew ka surok bad ka jingtyrkhong um bad kumta baroh ki jingphohsniew ki la long lehnohei lut. Hynrei mynta ka step pat ngi ïohi ïa u soh ka jingkyrmen da ka jingbuh ïa u mawnongrim ban shna noh ïa ka surok kaba wan lyngba ka jingtrei shitom u MLA jongngi ryngkat ki Rangbah Shnong,” ong u Rangbah Dong.
Katei ka jingkren jong u, kadei ha ka sngi ba u Myntri ka tnad C&RD Bah Hamlet Dohling ba dei ruh u MLA ka thaiñ u la leit ban plie ïa u mawnongrim na ka bynta ban shna noh ïa ka surok ba 2.74 klur tyngka kaba jrong 1kilometer na Mawpun Umlyngka sha Tyllong Um kynthup ruh ïa ka surok ban poi sha jaka jong ka Balang Presbyterian Umlyngka.
Haba bynrap lang, u Bah Stephan Lyngdoh bad Bah Treki Lakiang kiba dei ki Rangbah Shnong jong ka Umlyngka ki la ong ba katei kan dei ka sngi kaban sah kynmaw junom ïa ka shnong Mawpun.
“Kane baroh kadei lyngba ka jingtrei shitom jong u MLA jongngi ryngkat ryngkat u Chief Engineer ka tnad PWD bad khamtam eh ïa ki trai jaka kiba la ai sngewbha ban shna ïa kane ka surok,” ong u Bah Treki.
Haba bynrap lang, u Bah Stephan u la ong ba ki sngewkmen haduh katta katta ba ka thaiñ Umlyngka ka la ïoh shibun bha ki kam pynroi na une u MLA ba mynta khamtam eh haba ïadei bad ka projek umbam kaba 12 klur tyngka kaba la dep ban pynbna ha ka Dorbar Mangtyngka kaba dang shu dep shen.
“Ngam beiñ ïa ki nongmihkhmat barim hynrei une ba mynta u kham sngap bad kham stet ka jingtreikam bad ïa kane nga sakhi kum u nongshong shnong,” u la ong ha katei ka jingïalang kaba long ha Mawpun kaba la donlang ruh naduh ki spah ngut ki nongshong shnong kynthup ïa ki nongïalam jongka Balang Presbyterian.
U Chief Engineer ka PWD, u GK Marak pat u la ong ba ka jingïoh jong ka Mawpun ïa katei ka surok ba 2.74 klur tyngka kadei da ka jingtrei shitom u MLA jong ki. Ha kajuh ka por u la pan ruh ka jingiatrei lang na ki nongialam shnong bad ki paidbah khnang ba ka jingpyntrei ia ka kam kan stet bad dep ha ka por kaba biang.
U Bah Hamlet haba kren kum u Kongsan pat u la ong ba naduh ba u jop kum u MLA u la shim ïa ka jingkitkhlieh ban trei da ka jingieid bad ka jingthrang ban shakri pura ïa ka constituency. “Ban long MLA tang ka nam khlem ka jingkitkhlieh kam don jingmut,” u la ong da kaba bynrap ba wat hapdeng ka khlam COVID u la ïakhun tyngeh ban pyntyllun bun ki kam.
Shuh shuh u ong ruh ba lada ym dei na jingpynthut ka khlam COVID kitei ki surok ki la dei ban dep lut. “Kane ka surok dong Mawpun ruh nga la angnud la slem. Sa tang katto katne sngi yn sdang noh ban pyntrei ïa ka kumta nga kyntu ïa ki nongïalam shnong ban ïatrei ryngkat ryngkat bad ka PWD bad ruh bad ki kontraktor ban ïoh pyndep ïa ka surok ha ka por kaba biang” u la bynrap biang.
Nalor ka projek umbam kaba 12 klur kaba ka thaiñ kan ïoh shen, u Bah Hamlet u la pynbna ruh ba u la mang haduh 1klur tyngka na ka Soil and Water Conservation ban pynbha ïa ki pynthor ha Mawpun.
Namar ba katei ka thaiñ kadei kaba tyrkhong um bha, kumta ha ka por ba u MLA u leit ban phah pyrshang tan ïa ka um kaba pynpoi ha katei ka shnong, da ki spah ngut ki nongshong shnong ki la leit ban synran lang ryngkat ka durkhmat ba phuh samrkhie.
Shwa kane, u Rangbah Dong u la kyntu ruh ïa ki nongshong shnong ba kin iai shah shipor katba ka tnad ka dang pynbit pynbiang ha shwa ba kan pynpoi noh ïa ka um hapoh ka shnong.
