Moscow: Ki sakhi sabut bathymmai ki lap ba u President ka Russia u Vladimir Putin bad ki heh shipai ki la pyntyllun ïa ka jinghiar thma ïa ka ri Ukraine na ki krem rieh tngen.
U Nongmihkhmat jong ka Russia sha United Nations dang ha ka taiew ba ladep u la kam ba u Putin u donhok ban siat ïa ki bom niwkliar lada ka NATO ka pynwit halor ka jingleit kurup ka Russia ïa ka ri Ukraine.
Ka jingïaid lynti ki liengsuiñ ba la pyndonkam da ki heh Ophisar ka Kremlin ki la pynpaw ba u Putin u lah ban don ha ka krem rieh tngen hajan Surgut, ha Western Siberia.
U Defence Minister jong ka Russia u Sergei Shoigu uba la jah rngai da ki taiew, katba ka khubor hamsaïa ka kam ba u don hapdeng ka jingshitom, la ngeit ba u don ha ka krem rieh tngen hajan Ufa kaba don ha Urals, bad kaba jngai 725 mer na mihngi jong ka nongbah Moscow, katkum ka jingtohkit jong u Nongthoh khubor u Christo Grozev.
Ïa kane ka jingkam la kyrshan ruh da ka khun jong u, ka Ksenia Shoigu, 31 snem ka rta kaba la leit sha Ufa kaba la shondur lai sngi shwa ka 23 tarik mynta u bnai, katba ki khubor hamsaïa ki her stet ba u Defence Minister u la don mynta hapdeng ka jingpang klongsnam.
La kynnoh ba ka la shah khang ban pyndonkam ïa ka Instagram hadien ba ka la shondur bad i khun da kaba phong ïa ka rong jngum bad stem kaba thew ïa ka lama jong ka ri Ukraine.
Ka jingpynjur ïa ki shipai kiba pahara ha ki krem rieh tngen, lada pynthikna, la sngewthuh shai ba u Putin u la lah ban pynkhreh na ka bynta ban pyndonkam ïa ki tiar thma niwkliar.
