Shillong, Nailur 02: Ha ka sien kaba nyngkong eh ka Meghalaya kan mad ne ïohi ïa ka jingtreikam jong ka I-PAC ne kata ka Indian Political Action Committee kaba la seng da u Prashant Kishore.
Kane ka kynhun kaba don ka ophis mynta ha Nongthymmai ka treikam na ka bynta ka Seng Trinamool Congress ha Meghalaya namar kala ïasoi kontrak bad kane ka Party ban trei na ka bynta jong ka ha kane ka elekshon 2023.
Katkum ka jingtip ba la ïoh, la ïathuh ba ka I-PAC ka don da ki spah ngut ki nongtrei ha Meghalayam kiba rung lut sha ki kyndong kynshrot jong ka jylla lane ban rung ha kiba bun tylli ki Constituency ban wad ïa ki jingtip kiba bun naduh ka roi ka par, ka jingpyntreikam ïa ki skhim bad ban twad jingmut ruh halor ki riewpawkhmat kiba lah ban ai jingmut ne ai jingtip halor ka saiñpyrthei ha ka jylla.
“Ngi ïoh da ka jingsiew haba ngi leit kylleng kylleng ban wad jingtip na ki paidbah, na ki nongïalam shnong halor ka jingpyntreikam ïa ki kam pynroi bad ki saiñpyrthei ruh”, la ong kawei ka Samla kaba la buh ban wad jingtip ha kawei ka Constituency.
Ka la ïathuh ba kam pat pynïasoh bad ka Seng Trinamool, hynrei ka trei beit na ka bynta ka I-PAC katkum ka jingbthah jong ki ban wad jingtip. “Ka jingïadei bad ka Seng Trinamool kadei beit bad ki baheh bahaiñ ka I-PAC’, ka la ïathuh, da kaba bynrap ba ynda ladep kane ka kam kan leit ban bteng biang ïa ka jingpule ha ka Master Degree.
Katkum ki khubor, la sngewthuh ba ka TMC ha Meghalaya kan sa pynbna kyrtong hadien ba ka kynhun IPAC ka ladep ban leh ïa kane ka jingjurip ne ka jinwad bniah na kylleng kylleng ki Constituency.
Shuh shuh la ïathuh ba wat na ki Constituency kaba ki paidbah kim poi pyrkhat ba ka TMC kan don ne kan khlaiñ, hynrei ki Party ka lah ban sei kyrtong hadien ba ka la sngap ïa kane ka jingai repor kinto kiba rung sha ki shnong ki thaw.
Kum ban shu pynkynmaw hangne ba u Prahshant Kishore, udei na Bihar bad udei uba la ju trei bad ka UNP ha ka liang ka jingwad jingtip halor ka koit ka khiah. Hynrei hadien u la ïatreilang ba ki Party bapher bapher kum ka BJP ha ka por ba u Narendra Modi u dang long u Myntri Rangbah ka Gujrat. Nangta ba ka Janadal (United) bad ka Congress, AAP bad bun kiwei pat ki Party. Namar ka jingtbit ka buit bad ka rukom treikam jong u, bun ki Party ki wad ïa ka jingïarap jong u kumno ban jop elekshon.
