Shillong, Nailur : U MLA ka Mawlai u Bah PT Sawkmie hynnin ka sngi Palei u pynbna ïa ka skhim na ka bynta ban shna ïa ki surok ha Mawlai kaba kot sha ka T. 6 klur duna.
Na kane ka T. 6 klur duna kaba dei ka skhim jong ka PWD, T. 3 klur u bah PT Sawkmie u la pynbna na ka bynta ban tap slep pynkylla surok ïa ka nala kaba ïaid lyngba ïa Block A B bad C ha Mawlai Nongpdeng kaban ïarap bha ban pynbeit ïa ka jingeh kaba ki paidbah ki ju mad haba pang ba shitom bad na ka bynta ki kali kit um.
T. 70 lak na ka bynta ban shna ïa ka surok ha Block 3 Mawlai Umjaiur, hapoh T. 1 klur na ka bynta ka surok kaba don ha Mawlai Nonglum bad T. 1 klur tam na ka bynta ban tap slep ia ka nala kaban lah ban ïaid ar tylli ki kali ha Mawlai Phudmuri.
U bah PT Sawkmie u la pynbna ïa kine ki skhim ha ka jingdon ryngkat u Excutive Engineer ka PWD, u bah C Kharmudai, ki rangbah shnong, bah P. Khongsit jong ka Mawlai Nongpdeng, bah K. Khriam ka Umjaiur, ha Mawlai Nonglum la don u assistant rangbah shnong bad secretary, katba ha Phudmuri la don lang u acting rangbah shnong bah S. Khongkliam bad secretary shnong bad kiwei kiwei paidbah jong ki saw tylli ki shnong.
“Nga wan ban jngoh ïa kine ki jaka ban pyntip ba ngin sdang noh ban shna ïa kine ki surok, kaba ki paidbah jong kine ki saw tylli ki shnong ki donkam eh,” ong u bah PT Sawkmie haba kren sha ki nongthoh khubor.U la bynrap, “Ngin shna ba ki kali kit um bad kumjuh ki trok 407 kin lait na ka bynta kiba tei ïing thymmai ha Nongpdeng.”
Haba kren ha Umjaiur u pynpaw ba kin leh shuwa ïa ka surok bad ia ki nala yn sa nangleh hadien. U pynpaw ruh ba ha ka taïew ban wan kin ai laiñ noh bad shen ruh kin sa shna noh ïa kine ki surok.
Haba ai jingkren na ka liang u rangbah shnong Mawlai Nongpdeng, bah P Khongsit, na u jong ka Mawlai Umjaiur u bah K. Khriam, na u assistant rangbah shnong ka Nonglum bad na u bah S. Khongkliam ka Phudmuri ki la pynpaw ba kane ka sngi sahkynmaw na ka bynta jong ki, hadien da ki phew snem ka jingangnud jong ki shnong ka la urlong mynta.
Ha kajuh ka por ki la ai khublei bad pynpaw ïa ka jingsngewnguh ha kaba ïa dei bad kine ki surok ba u MLA u la shimkhia ban buddien haduh ba kan da urlong.
Ha kane ka sngi la ïoh ruh ïa ka jingkren na u excutive engineer ka PWD uba la pynthikna ïa kine ki skhim ba la pynbna da u MLA bah PT Sawkmie bad u la pynpaw ruh ba shen kin sa pyntrei noh ruh ïa kine ki surok.
Nalor kata u la kren shai ba kine ki surok ki dei jong ki paidbah, ym jong ka tnad PWD bad u kyrpad ïa ki paidbah ba kin ïatrei ryngkat bad ki nongshna bad ban ïai shah lang, khnang ba ki jingshna ki long kiba ïaid beit ïaid ryntih.
