Jowai, Nailar 29 : Ka All Jaiñtia Commercial Vehicle Association (AJCVA) kan pyllong da ka Rally paibah ha ka 01/09/2022 ha ka por 11:00 mynstep, kane ka Rally lane ka jingïa ïaid paidbah kan sdang na Iawmusiang Jowai haduh Lad College.
Ka jingthmu kane ka Rally ka long ban pyrshah bad ban pynrem jur ïa kito ki riew thrang snam kiba shim ïa ka jingim jong ki arngut ki nongñiah kali kamai jong ka Rilum Jaiñtia ha kine ki taiew ki ba lah dep.
Ka Association lyngba kane ka khubor ka khot lang ïa ki nongshong shnong jong ka Bri U Hynñiewtrep naduh ki nongsynshar shnong, ki seng bhalang, ki riew shemphang, ki Association, ki riew paw khmat bad ki paidbah ban ia wan sha kane ka rally pyrshah ïa ki to ki riew khlaw ki ba shim ïa ka jingim jong ki mynsiem ba lui lui.
Shuh shuh ka Association ka la bynrap ba kum ki nong shong shnong kiba don ka jingkitkhlieh na ka bynta ka lawei ba bha ha ka imlang sahlang ka la dei ka por ba ngin kyndit bynriew noh bad ban ïa tylli ban ïa mih sha khmat ban pynduh shi syndon ïa kum kine ki jait jingsniew.
Khatduh ka Association ka kyrpad ïa ki bor ba dei peit ban shim khia ïa kane ka kam namar lada kine ki nongpynïap briew ki ïoh ban im lait lan shaei kan ïalam ïa ka Ri bad ka Jait bynriew jong ngi?.
