Hato ka UDP ka la thikna ban ai tiket ïa u Samla Sunshine Makri na Umsning?

Nongpoh, Nailar 28: Ki dak ki shin ki paw ba ka tiket UDP ka kham noh sha u Samla Sunshine Makri na Umsning Constituency ha kane ka elekshon ban wan, watla ka party haduh mynta kam pat pynbna ïaka tiket mano ban ïakhun na Umsning Constituency, kumba la kren shai ruh da u President ba rangbah ka party u bah Metbah Lyngdoh ba ka tiket dei ki paidbah ki ban rai.
Kum ban shu pynpaw ba ki don ar ngut ki kyrtong kiba thmu ban ïakhun naka party UDP na Umsning kata u Donkupar Sumer u ba dei ruh u MDC barim bad working President ka UDP ha Ri-Bhoi bad u Samla Sunshine Makri u ba la mih noh naka kynhun UCPF ban leit pynïasoh bad ka party UDP ryngkat ki nongkitkam bad ki hajar ngut ki paidbah nongkyrshan haka jingïalang kaba la long ha Umsning haka sngi Saitjaiñ.
Lyngba ka jingleit pynïasoh u Samla Sunshine Makri u ba la thmu ruh ban aireng ïaka elekshon sha ka iing dorbar thawaiñ ka jylla, sha ka party UDP ryngkat ki hajar ngut ki nongkyrshan kala nang pynkhlaiñ ïaka party UDP ha Umsning kaba don ruh ka jingkyrmen kaba skhem ban jop beit ïaka elekshon ha u snem 2023.
Hynrei u dak jingkylli ba hakhmat mynta ïano ka party UDP kan pynbna tiket na Umsning? Kumba u Bah Donkupar Sumer u don ruh ka jingthmu ban aireng biang ha kane ka elekshon ban wan u ba dei ruh uwei naki nongkyrshan bad nongïalam ka party naduh ki snem bala leit.
Ka jinglah jong u Samla Sunshine ban pynmih ïaki hajar ngut ki nongkyrshan haka sngi Saitjaiñ haka jingleit pynïasoh bad ka UDP kala paw ba ka tiket kala kham noh sha u, ha kaba wat u President ba rangbah ka Party u la kren shai ba ka party kan nym pynduh jingkyrmen ïaka jingkwah jong ki paidbah namar dei ki paidbah kiban ai ïaka rai.
Kumba long haduh mynta ka lyer elekshon ha Umsning Constituency kala sdang ban khluid, bad lehse kan dang don ruh shibun ka jingïa rung ïamih party haki sngi ban dang wan.