Shillong, Nailar 27 : Ka Khasi Jaiñtia Deficit School Teachers Association (KJDSTA) ha ka sngi Thohdieng ka la pynlong ïa ka jingïakynduh lang ba shisien shisnem jong baroh ki nonghikai deficit na kylleng ka bynta jong ka Rilum Khasi-Jaintia. ban ïatai ïa thir bad ban ai ruh ki kaiphot treikam jong ka sha ki nonghikai baroh ïa kaba la pyllong ha Don Bosco Hall, Laitumkhrah Shillong.
Haba kren sha ki lad pathai khubor hadien ka jingïalang, ka President jong ka KJDSTA Kong Suzan Syiem ka la ong ba ka mat kaba ha khmat eh kaba na ka liang ka synjuk ka buh ka long ka ban kyntiew ïa ka arrear pay na ka 50% kat kum ka jingai jingmut jong ka 5th Pay Commission.
Ka Kong Suzan la ïathuh ba ïa kane ka jingdawa kaba ki dawa na ka sorkar bad ba na ka liang ka sorkar ruh ka la kular ban siew ïa ka arrear da 100% na bynta ki nonghikai kiba la shongthait bad ne kiba la khlad noh hynrei naduh u snem 2017 hynrei haduh mynta ki dang ïoh tang 50% katba ïa ki nonghikai kiba dang don ha ka kam ka la kular ban ai shuwa 50% hynrei kat haduh mynta kim pat ïoh satia ïa kane ruh. “Na ka lïang jong ngi ngin bud dien ïa kane tad haduh ban da ïoh” ong ka Kong Suzan Syiem.
Ha kawei ka bynta, ka la pynpaw ïa ka jingsngewlem ïa ki nonghikai kiba shah thung kam shuwa u snem 2010, da kaba ka la kdew ba ka KJDSTA ka dang ïaleh ban pynïoh lem ïa ka Social Security na bynta jong ki, namar ki nonghikai kiba shah thung kam hadien u 2010 ki ïoh da ka national pension scheme, katba ïa kiba ha shuwa u 2010 kam don kano kano ka jingai bai bam tymmen ïa ki ka la ong.
Shuh shuh ka la ïathuh ba na ka liang jong ka KJDSTA ka la thung ruh da ka ka committee kaba kyrpang ban wad ki lad ki lynti ban kyntiew ïa ka jingpule bad ka rukom ai jinghikai ïa ki khynnah pule. “Ngim dei ban hikai ha kato kajuh ka rukom kaba ngi ju leh 30 snem mynshuwa, namar ka juk ka lah kylla ngi hap ban pyndonkam ïa ki technology bapher bapher kat kum ka jingïaid ka por bad ka jingkylla ka juk”, ka la ong
Haba ïadei bad ka jingpyndonkam ïa ki “Smart class”, ka Kong Suzan ka la kdew ba ha ka jingshisha kane ka la dei ka kabu kaba biang na bynta ki nonghikai ba kin lah ban ai jinghikai ha ka juk bad ki rukom ba thymmai ïa ki khynnah skul hynrei ka la ong ba ki technology ki dang duna ha ki skul bad ki jaka pule. “Jin lada ki la biang nga sngew ba kane ka dei ka kabu ksiar ban ïoh ai jinghikai ha ka rukom kaba thymmai bad ka rukom kaba ki khynnah ruh ki bang ban sngap” ka la ong.
