Shillong, Nailar 27 : Ka National People’s Party (NPP) ha ka sngi Saitjaiñ ka la rai ban ïaid noh marwei ha ka elekshon MLA kaban long ha u 2023 da kaba kyntait ban ïatreilang bad ka BJP watla mynta ki ïatreilang ha ka sorkar synrop jong ka Meghalaya Democratic Alliance (MDA).
“Ngin ym mih ïatreilang badno badno ruh ha kane ka elekshon MLA kaban long ha u snem ban wan kynthup wat ïa ka BJP ruh,” ong u Conrad ba dei ruh u National President jong ka National People’s Party (NPP) ha ka National Committee Meeting kaba long ha Constitution Club of India, New Delhi.
Ha kane ka jingïalang ladonlang ruh da baroh ki nongïalam ba hakhmat jong ka NPP kynthup naduh u National Vice President Bah Prestone Tynsong nalor kiwei kiwei ki nongïalam kynthup ïa ki dkhot ka national committee bad President jong ki State Unit.
Ha katei ka jingïalang, ka party ka la ïatai ruh halor ka elekshon kaban wan ha Meghalaya, Tripura bad ruh ha Nagaland.
Haba kren bad ki lad pathai khubor, u Conrad u la ong ruh ba ka party ka la pynkhreh bha na ka bynta katei ka elekshon ban wan.
Na ka liang u Conrad haba jubab halor ka jingkylli la ka NPP kan ïatrei lang neem pat bad ka BJP u la ïai ban biang ba ka party kan ïaid marwei bad kan ym ïatreilang badno badno ruh.
Shuh shuh haba kren halor ka jingwan rung jong ka TMC ha Meghalaya, u Conrad u la ong ba katei ka party ka la dep ban shimti kum ka Liang Pyrshah hynrei ka la sdang pat ban pyni ïa ki dak ïapait ïa pra ha ka party.
U ong ba ka TMC haba ka rung ha Meghalaya ka pyrshang ban pynjur ka jingsawa. Hynrei u la ong, “Katei kam dei satia kaba suk ba da kaba pynjur ïa ka jingsawa da ki lad pathai khubor kan don ka jingktah,” kob u Conrad.
Ka National Committee ka la shim ruh ïa ka rai ban thaw ïa ki komiti bapher bapher ban pynkhlaiñ ïa ka party bad ha kaneka jingïalang la shim ruh ïa ki sienjam kumno ban pyntyllun noh ïa ka kam shakhmat.
