Nongpoh, Nailar 27: Ka Seng Federation of Khasi Jaiñtia and Garo People (FKJGP) North Khasi Hills District, mynta ka sngi ka 27 tarik u Nailar kala ïoh ban pynkup burom bad ai khusnam ïa 29 ngut ki samla pule ka thaiñ Ri Bhoi kiba pass bha bad wan shakhmat ha ka eksamin SSLC bad HSSLC jong u snem 2021-22.
Ïa kane ka jingïalang pynkupburom la ïoh ban pynlong hapoh ka Parish Hall Nongpoh ha kaba u samla Pynshai Kharbani Education Secretary ka FKJGP Sengkmie u la long kum u kongsan ha ryngkat ka jingïadonlang u bah Luistar Lyngdoh President FKJGP NKHD, u Bah Lumlang Mawnai Senior Vice President ka FKJGP NKHD, u Samla Shanlang Diengdoh, General Secretary, ki kmie ki kpa ki samla pule bad kiwei kiwei.
Ki samla pule kiba la shah pynkup burom bad ïoh khusnam ha kane ka sngi ki don baroh 29 ngut baroh kynthup ïa iwei na ki nongïoh khusnam i bala khlad noh na kane ka sla pyrthei.
Haba kren ha katei ka sngi naka liang kitei ki nongïalam ka FKJGP kila kyntu ïa ki samla pule ba kin trei shitom shuh shuh ha ki jingpule jong ki ba kham shalor, bad katei ka jingai khusnam ka long ruh kum ka jingai mynsiem ïaki samla pule ba kin dang bteng ïaka jingtrei shitom jong ki khnang ba shisien ka sngi kin long ki khlur ba tyngshaiñ bad khamtam kum ka seng ka khmih lynti ruh ba napdeng kitei ki samla pule kin don ruh ki ban ïalam ïa ka jylla naduh ki IAS, IPS bad ha kiwei kiwei de ki kyrdan bapher bapher.
