Shillong, Nailar, 24: Ka Iingbishar Meghalaya High Court ha ka sngi Balang ka la pynwai noh ïa ka mukotduma kaba ïadei bad ki kam die madan.
Ka jingpynkut noh jong ka Iingbishar hadien hynriew snem ka jingïakhun mukotduma ba ka Sorkar Jylla kan pyntreikam bujli da ka aiñ jong ka Sorkar Pdeng na ka bynta ka kamai kajih jong ki nongdie madan ka la kut noh da ka jingpynmih hukum jong ka Iingbishar.
Ha kaba ïadei bad kane, ka Meghalaya Greater Shillong Progressive Hawkers and Street Vendors Association (MGSPHSVA) kaba long ka kynhun jong ki nongdie madan ka la pynpaw ïa ka jingsngewhun ba hadien hynriew tylli ki snem ka jingïakhun kaba angnud ba ka Sorkar Jylla kan pyntreikam bujli da ka aiñ jong ka Sorkar Pdeng na ka bynta ka kamai kajih ki nongdiemadan.
U General Secretary ka Seng u Bah Shane Thabah, u la pyntip ba ka Iingbishar kaba la khlieh da u Chief Justice u Sanjib Banerjee ka la bthah ruh ïa ka Sorkar Jyllla ban shna noh mardor ïa ki Rule khnang ban lait na kino kino ki jingeh bad ba kan shong hok ïa baroh.
Ka Seng ki nongdie madan, ka la kyntu ruh ïa ka Sorkar ba haba shna ïa ki Rule ka dei ban long kaba shai bad kaba shim jingmut lang na baroh, khamtam na ki nongdie madan. Ka Seng la ka kyrpad ïa ka Sorkar ba kan khmih ruh ïa ki Draft Rule kiba ka Seng ka la ai sha ka Sorkar na ka por sha ka por.
Ka Seng ka la ai khublei ïa baroh ki dkhot bad ïa ki para nongdie madan kiba la ïaineh ha ka jingïakhun bad ha kajuh ka por ka kyntu ïa baroh ki dkhot bad ïa ki nongdie madan ban ieng lang kawei bad ban ïatreilang da ka jingshemphang ryngkat bad ki bor Sorkar.
“Da, ka jingïatreilang ngi dei ban wanrah ïa ka Town Vending Committees (TVC) kaba khlaiñ bad kaba lah ban treikam janai. Ki Rule ki dei ban kren bad kdew shai halor ka jingpynlong ïa ka Town Vending Committees (TVC) kaba dei ban kynthup haduh 40 percent ki nongdie madan kum ki dkhot nalor kiwei,” ong une u nongïalam ka Seng.
“Nangta ban pynlong ïa ka jingsorjamin ïa ki jaka shong die jingdie ki nongdie madan (in setu survey), ban kdew ïa ki jaka ba lah ban shong die jingdie (Vending) bad ki jaka bym lah ban shong die madan (No Vending Zone), ka por ne kynta ban shong die jingdie. Ka Holding Capacity katkum ka jingdon jingkheiñ ki nongshong shnong. Ha ki Rule dei ruh ban kdew shai ba ki jaka ha syndah ki Heritage ne Traditional Market ki dei ki jaka kiba ym lah ban weng ïa ki nongdie madan bad ym lah ruh ban weng ne pynkynriah ïa ki nongdie madan ha ka kyrteng jong ka roi ka par khlem ka jingïakren ne ïa pynbeit lang bad ki nongdie madan,” ong shuh shuh une nongïalam ka Seng.
“Kumta ki nongdie madan bad ki dkhot jong ka Seng kim dei ban khih jingmut halor ki khubor kiba shiteng shiliang. Ha,oid kan sa don ki jingpynbeit na ka por sha ka por bad ngin ïatreilang bad ki bor Sorkar. Khamtam eh, la kyrpad ïa baroh ki dkhot bad ki para nongdie madan ban pynbeit ruh da lade ïalade katkum ki rai kiba la shim ha ki jingïalang jong ka Seng,”la kyrpad une u nongïalam ka Seng.
Ka seng ka ai khublei ïa ki nongïasaid ain jong ka, u Kastav Paul, u Phiyo yobin bad ïa ki nongïarap kiba la trei shitom khlem shongthait ha kine ki hynriew snem jong ka jingïakhun bad ha kajuh ka por ka seng ka ai khublei ruh ïa ka Kong Angela Rangad bad ïa u Bah Kyrsoibor Pyrtuh kiba long kum ki dkhot ba kyrpang jong ka Seng kiba la ieng lang bad ka seng naduh kaba sdang.
