Shillong, Nailar 24: Ka National People’s Party (NPP), Meghalaya ha ka sngi Balang ka la pynlong ïa ka jingrakhe ïa ka lyngkhuh snem ba 10 jong ka jingsdang ïa ka kaba la pynlong ha ka ophis treikam ka party ha Lower Lachumire, Shillong ha kaba u National President jong ka uba long ruh u Myntri Rangbah jong ka jylla u Conrad Sangma, u National Vice President u Bah Prestone Tynsong, u Treasurer u James Sangma, u President ka Meghalaya State Unit u Dr WR Kharlukhi ki la wan shim bynta.
Haba ai jingkren ha kane ka sngi u Conrad Sangma u la ñiewtang ïa ki khana kiba kum ka party ki la ïaid lyngba ha ki shiphew snem kiba la leit. U Conrad u la kdew ruh ba kum ka party ka long kaei kaei kaba khraw kaba ki la kynjoh namar ka dei tang ma ka na ki seng saiñ pyrthei baroh ha North East ban ïoh ïa ka kyrdan National Party kata ruh tang 7 snem hadien ba la seng ïa ka.
U Conrad u la khot la wer ïa baroh ki nongtrei bad ki nongkyrshan ka party ban trei kham tyngeh khnang ban pynthikna ba ka party kan ïoh ban bat ïa u lakam synshar khlem donkam ka jingkyrshan na kiwei pat ki seng saiñ pyrthei.
“Kum ka party ngi la lah ban ïoh ïalam ïa ka sorkar ha ka jylla bad ruh ha ki District Council, kynmaw ym don kano kano ka khana jingjop kaban kham khraw palat ban ïa kaba ngin ïoh lad ban synshar hi ïa ka jylla” u la ong.
U la ong ruh ba kum ka party ka la buh lupa ha ka jabieng ïa ki buit ïakhun na bynta ka ilekshon sha ka Lok Sabha ha u snem 2024.
Haba ïadei bad ka jingpynbeit pud ha ka wat kaba nyngkong u la ong ba kaei kaba ki shim rai ban ïaid shakhamat wat hapdeng ka jingshah kynthoh kaba jur kaba lehse kaba yn ym lah ban pynïoh nong ha ka saiñ pyrthei hynrei kaei kaba ki la leh ka long na bynta ka jylla bad ban pynurlong ïa kaba ki nongshong shnong hi ki angnud.
Haba kren halor ka jinglong tylli kum ka party u la ong, “Dang shen ka don ka jingbym sngewthuh jingmut hapdeng ki para nongtrei jong ka party dei ynda ngi kum ki nongïalam ngi khot ban sngap na baroh arliang ba ngi sa lah ban poi biang sha ka jingsngewthuh jingmut na kata ka daw kum ka party kin don ki jingïapher jingmut hangne hangtai hynrei ka jingïatreilang kum ka kynhun ka dei ka jubab ïa baroh ki jingbym sngewthuh jingmut ba ngi don.”
U Conrad ha kane ka sngi u la ïathuh ruh ba ka jingwan pynïasoh jong u Bah Prestone, u Bah Sniawbhalang Dhar ka long ka jingkyrkhu kaba khraw eh ia ka party bad u la bynrap “ma ngi bad u Bah Prestone bad u Bah Sniawbhalang bad kiwei de ki nongïalam ngi la don ka jingïakynduh kaba jar jar haduh 6 sien ha ki jaka kiba ym don mano mano ban poi pyrkhat bad ym don hi mano mano ba bna ïa kane tad haduh ba kin da pynban paidbah hi” u la ong.
U Bah Prestone haba kren ha kane ka sngi u la kren lang ïa ïa kajuh ka mat kata ban pynthikna ba ka party ka dei ban ïoh bat hi beit ia u lakam synshar hadien ka ilekshon.
Haba ïadei bad ki jingkynnoh kiba bun bah kiba kum ka party bad ki nongïalam jong ka ki mad u Bah Prestone u la ong “Ki lah ban kynnoh bad ki lah ban kynthoh hynrei peit bha kat nang mih ki sngi ki nang bun ki riew rangbah bad ki riewpawkhmat kiba wan pynïasoh bad ka party”.
