Shillong, Nailar 24 : Ka Kynhu Myntri mynta ka sngi ka la rai ban plie noh i ïa ka National Law University ha ka jylla bad halor kane yn sa wanrah ïa ka National Law University of Meghalaya Bill 2022 ha kane ka Dorbar Synrai ka ban sdang naduh ka 9 tarik Nailur.
Haba pyntip ïa kane hadien ba la wai ka jingiakynduh ka kynhun myntri, u Myntri ka tnad kam Aiñ ka jylla u James P.K Sangma u la ïathuh ba ka sorkar dang shen ka la mynjur ïa ka National Law University of Meghalaya Ordinance bad mynta pat yn pynkylla ïa ka kum ka Bill bad hadien bala wanrah hapoh ka ïing Dorbar bad ïoh ka jingmynjur kan sa long pat kum ka aiñ jongkane ka University.
Ka sorkar ka la mang ruh 6.5 klur na ka bynta ban tei ïa kane ka Univeristy.
Kham mynshwa haba u Myntri Rangbah u Conrad K Sangma ula pynbna shaphang ka jingplie ïa kane ka Univeristy u la ong ba kane ka University kan treikam shwa na ka jaka ban shu buh shibit por katba ym pat dep tei ïa kane ka skul bah ha ka jaka ba dei ban tei. Yn sdang shwa ruh tang 60 ngut ki samla pule ha ka shisnem.
U Myntri Rangbah u la ïathuh ba ka jingmang ban pynlut ïa kane ka University kan kot beit sha ka 6 klur tam shisnem namar hap ban pynbiang lut nadong shadong naduh ki jaka shong, ki miej ki shuki, ki computer bad ter ter.
