Shillong, Nailar 24 : Ka dor jong ka petrol bad diesel ha ka jylla kan kiew biang hadien ba ka kynhun Myntri kaba long ha kane ka sngi Balang ka la shim ïa ka rai ban pynkiew ïa ka khajna na ka bynta kitei ki umphniang kali.
Haba pynbna ïa kane, u Myntri ba dei peit ïa ka tnad Khajna ka sorkar jylla, u James K Sangma u la ong, “Mynta ka khajna na ka bynta ka petrol ka long 13.5 persen lane 11 tyngka shi litar lane kano kaba kham heh. Kumta da kane kaba pynkiew thymmai ka khajna na ka bynta shi litar ka long 12.50 shi litar lane kano kaba kham heh.”
Katkum ka jingong jong u, ka dor jong ka petrol mynta ha ka jylla kan kiew da kumba 1.50 tyngka shi litar.
Haba ïadei pat bad ka diesel, u Myntri u ong ba baroh shi katta ka khajna ka long 5persen lane 4 tyngka shi litar kumta da kaba pynkiew thymmai ka khajna kan poi noh sha ka 5.50 tyngka shi litar lane kano kaba kham heh.
Kumta katkum ka jingong jong u ka dor Petrol mynta ha Shillong kan poi 96.83 tyngka shi litar bad 95.10 ha Byrnihat katba ka Diesel pat kan long 83.50 tyngka shi litar ha Byrnihat bad 84.72 tyngka shi litar ha Shillong.
U Myntri u la ïathuh ruh ba wat hadien ka jingkiew ka khajna bad ka dor jong ka petrol bad diesel hynrei ka Meghalaya kadei ka jylla kaba tad tam ka dor jong ka umphniang kali ha ka ri baroh kawei.
U ong ruh ba katei ka rai ban kyntiew ïa ka khajna kadei hadien ba ka sorkar Assam ka la rai ban kyntiew biang ïa ka khajna ha ka petrol bad ka diesel.
