Shillong, Nailar 23: Tang shi sngi hadien ba u la kular ha khmat ki paid nongrep bad ki nongïalam shnong ha ka jingïalang ha Mawkatheiñ ban leit ïakren bad ki bor bahalor ka Sorkar India ban mang noh ïa ka bhah sboh dawai sha ki nongrep ka Jylla Meghalaya, u Myntri ka tnad kam rep ka Sorkar Meghalaya, Bah Banteidor Lyngdoh mynta hi ka sngi ka 23 tarik u Nailar, 2022 u la da kloi ban ïakren ïa kane ka mat bad u Myntri Khynnah ba dei khmih ia ka tnad Chemicals and Fertilizers ka Sorkar pdeng u Bhagwant Khuba ha Delhi bad une u myntri u la kular ban ai ïa ka dawai sboh sha ka jylla Meghalaya na ka bynta une u 2022 kat kum ka jingdonkam jongka jylla.
Ha kane ka jingleit ïakren bad u Myntri Khynnah ka Sorkar India la ïa synran lang ïa u Bah Banteidor Lyngdoh da u Bah Gavin M Mylliem, MLA ka Sohra uba dei ruh u President ka People’s Democratic Front (PDF).
Dang ha ka 22 tarik u Nailar, 2022, u Bah Banteidor u la kular ba un her sha Delhi ban ïakren na ka bynta ka bhah dawai sboh sha ki nongrep ka Jylla ha ka jingïalang pynshai bad pynsngewthuh paidbah halor ka jingailad ka tnad kam rep lyngba ka Office Order ba ki nongrep kin ïoh biang ïa ka lad ban pyndonkam dawai sboh kum ka Urea, DAP, MOP bad SSP ha ki jaka rep bad na ka bynta ki jingthung jong ki.
Ka tnad ka la pynmih ïa ka Office Order ha ka 9 tarik u Nailar, 2022 bad kane ka la wan hadien 8 snem naduh ba ka Sorkar Jylla lyngba ka tnad kam rep ka la pynsangeh ïa ka subsidy na ka bynta ki dawai sboh sha ki nongrep ha ka 12 tarik u Jylliew, 2014 khnang ban pynduna ïa ka jingktah ki dawai sboh ïa ka koit ka khiah ïa ki nongshong shnong.
Ka jingwanrah ia ka office order ban shah pyndonkam dawai sboh kan long ha ki katto katne ki jaka rep namar la ïohi ïa ka jingdonkam na ka bynta ki mar rep kum u phan, sohsaw, u kubi, u phul, kajor, muli,bad kiwei kiba ju rep kynrei ha ka Jylla.
Ka hukum ka tnad ha u snem 2014, ka la wanrah ka jingkhaïi tuh ïa ka dawai sboh bad ki nongrep ki kyang shla na ka jingkiew dor. “Ka tnad mynta kan peit ba ka dor kan wan katkum ka dor ba la mang da ka Ministry of Chemicals and Fertilisers ban ïarap ïa ki nongrep”, u la ong ha ka kyrwoh sha ki lad pathai khubor.
U la ong ba ka Meghalaya State Cooperative Marketing and Consumers’ Federation Limited (M.E.C.O.F.E.D) hapoh ka Department of Cooperation, kan dei tang ma ka, ka bynta ban shim ïa ka bhah dawai sboh ka Jylla na ka Indian Farmers Fertiliser Cooperative Limited (IFFCO) bad ban pynpoi sha ki nongrep kiba donkam.
U la ong ba ka tnad Agriculture bad Horticulture kin shim jingithuh ïa ki jaka kiba donkam ban pynpoi ïa ka dawai sboh katkum ka jingdonkam ki nongrep ha kine ki jaka. “Na ka liang u Myntri Khynnah ka Sorkar India u la pynpaw ka jingbhah dawai sboh sha ki nongrep Jylla kan sdang noh shen “, la ong u Myntri.
Da kaba ai khublei ïa ka tnad Chemical and Fertilizers ka Sorkar India, u la ong, “Ka tnad ka la shim khia mardor tang shu ïoh sngew ïa ki jingud jingnam ki nongrep ha ka Jylla namar ka jingpynmih mar rep kam kiew shuh bad ktah ïa ka ïoh ka kot jong ki nongrep watla ka jingpyrshang ban wanrah ïa ka rukom rep khlem dawai sboh ruh kan ïaid ryngkat lang”.
