Hukum ka DC ïa ki nongdie madan ban kynriah lut na ki lynti ïaid kjat bad rud surok

Shilong, Nailar, 23:Ka Deputy Commissioner jong ka East Khasi Hills Disrict ka Kong Isawanda Laloo, ha ka sngi Baar ka la pynmih da ka hukum kaba bthah ïa baroh ki nongdie madan ba ki dei ban kynriah na ki lynti ïaid kjat bad na ki jaka die jingdie harud surok namarba ka la pynwit bad pynthud shaba palat ïa ka ïaid ka ieng jong ki paidbah bad ki kali ha sor Shillong.
Ka Deputy Commissioner ka la thaw ruh da ka Komiti ka ban khlieh da ki Majistor ha kaba yn kynthup lang na ka tnat Pulit, ki Ophisar na ka Shillong Municipal Board, ka tnat PWD bad kiwei kiwei de ki kynhun.
Katkum kane ka hukum, ka Deputy Commissioner ka la pyntip ruh ba kane ka Komiti kan sa leit sorjamin hapoh shiphew sngi ïa ki jaka ba la satah shaba palat da ki nongdie madan, kata, ha ka thaiñ Motphran, naduh GS Road shaduh District Council, na Umsohsun sha Motphran, na Motphran shaduh Mawlonghat (Anjalee), ha Motphran, na Motphran sha Mission Compound, na YMCA Point sha Motphran.
Ha ka thaiñ Police Bazar, kane ka Komiti kan sa leit jurip ïa ka Thana Road, Jail Road, Police Bazar Main Road (Khyndai Lad sha Dreamland) bad ha Khyndai Lad Point.
Ha Polo, ki jaka ba la satah da ki nongdie madan ki long naduh ka jingkieng Polo shaduh SRGT terter shaduh Lawmali.
Ka Komiti kan sa leit sorjamin ruh ïa ki nongdie madan ba la jyllei ha Shilong Civil Hospital ha shilynter ka surok NH-44, ha IGP Point, ha Barik Point bad ha ka thaiñ Laitumkhrah kata naduh Fire Brigade shaduh Beat House ter ter shaduh Police Point.
Kiwei pat ki jaka ba la satah da ki nongdie madan ki long ha ka thaiñ Laban Last Stop, ha Rynjah, ha Nongmensong Point shaduh Wahkdait bad ha Madanryting Taxi Stand.
Lyngba kane ka hukum, ka Deputy Commissioner ka la pyntip ba ka Komiti kan sa peit ïa ki jaka ban pynshong ïa ki nongdie madan kiba shong harud surok bad ha ki lynti ïaid kjat lane kiba pynwit ïa ka leit ka wan jong ki kali bad kumjuh ruh ïa ki nongdie jingbam harud surok ha ka rukom ka bym i khuid.
Da kane ka hukum, ka Deputy Commissioner ka la bthah ïa u Superintendent of Police ka East Khasi Hills ban phah ïa ki bor Pulit ban synran lang ïa ki Majistor.
Ka Deputy Commissioner ka la maham ba kino kino ki nongdie madan ki bym ai ka jingïatreilang bad ki Majistor kin shah pynshitom katkum ki kyndon jong ka aiñ.
Ka Deputy Commissioner ka la kdew ruh ïa ka hukum jong ka Meghalaya High Court kaba 16 tarik, Nailar, 2022 ha ka jingshong bishar ïa ka kam kaba ïadei bad ki nongdie madan bad ïa ka hukum kaba la pynmih ha ka 16 tarik, Nohprah, 2032 ha ka Public Interest Litigation (PIL).
Ha kaba ïadei bad kane, u Chief Secretary ka Sorkar Jylla u Bah Donald. P. Wahlang u la lum jingïalang ha ka Lah Sngi u Blei ban bishar bniah ïa ka hukum jong ka Iingbishar Meghalaya High Court kaba la bthah ïa ki Deputy Commissioner ba kin pyntreikam noh mardor ïa ka hukum.
“La ïoh ujor na ki bor synshar shnong bad na ki nongshong shnong ba la jyllei shaba palat ki nongdie madan harud surok ha kiba bun ki jaka hapoh ka sor bad ka jingbym biang ki jaka die madan jong ki nongdie madan ka la ktah ïa ka ïaid ka ieng jong ki nongleit nongwan bad ki kali bad khatmtam eh ïa ki riewtymmen bad ïa ki khynnah skul,” ong ka Deputy Commissioner ha kane ka hukum.
Ka Deputy Commissioner ka la pyntip ruh ba la ïoh jingtip halor ka jingmynsaw jong ki nongïaid ïaid lynti hadien ka jingshah tynrah ha ka Bos hadien ba ki nongïaid lynti kim banse ban ïaid sharud surok na ka daw ba ïa ka lynti ïaid kjat la shong die jingdie da ki nongdie madan. “Kane ka la buh jingsyier ïa ki paidbah lada ïa ka lynti ïaid kjat ba la shna khnang na ka bynta ki nongïaid lynti yn kyntur pynban da ki nongdie madan,” la ong kane ka hukum.
“La ïoh ujor ruh na ka seng ki briew kiba don jingduna ha ki dkhkotmet kiba pynpaw ba ma ki ruh ki don ka hok bad ban ïaid khlem da shah pynwit ha ki lynti ïaid kjat,” ong ka Hukum.
Ka Deputy Commissioner ka la pyntip ruh ba la ïoh ujor ba ki don ki nongdie madan ha nongbah Shillong kiba die jingbam ha ka rukom ka bym khuid ïa kaba kim shym la bud satia ïa ki kyndon jong ka koit ka khiah, ka jingpyndonkam ïa ki shawla, ki karai sdieh shana, bad pynmeh ding harud surok ka buh jingma ym tang ïa ki nongdie madan hynrei wat ïa ki paidbah ruh kumjuh.
Haba kdew ïa ki kyndon jong ka aiñ, ka Deputy Commissioner ka la ong, “ka hok ban ïaid laitluid jong ki kali ka la kdew ha kiba bun ki kyndon jong ka Motor Vehicles Act, 1988 ha kaba ka Section 179 ka la ong ba dei ban shaiñ kuna ïa kiba pynwit ïa ka jingïaid beit ki kali ha ki surok paidbah. Ka jingkyntur sha ki surok paidbah ka long ka jingpynkheiñ ïa ka Meghalaya Police Act and Control of National Highway (Land and Traffic) Act, 2002. Ka hok jong ki nongïaid lynti ban ïaid laitluid bad ban pyndonkam ïa ki surok khlem da shah pynwit ka dei ka Fundamental Right kaba kdew katkum ka Article 19 (1) (d).”
Na ka bynta ka bit ka biang ha ka leit ka wan bad ka ïaid ka ieng jong ki paidbah ka Deputy Commissioner ka la hukum ïa ki nongdie madan ba ki dei ba kynriah noh na ki jaka ba ki shong pynwit harud surok bad ha ki lynti ïaid kjat.
La pynmih ïa kane ka hukum na ka bynta ka jingbit jingbiang lang ïa baroh, la ong ka Deputy Commissioner.