Ka bym lah long ban ong ba ym lah shuh ban pynbeit biang ïa ka MoU: KSU

Shillong, Nailar 23: U President ka KSU u Samla Lambokstarwell Marngar ha ka sngi Baar u la ong ba ka jingbishar biang ïa ka soskular pynbeit pud (MoU) hapdeng ka jylla Meghalaya bad Assam kam dei kaei kaei kaba ym lah long namar baroh ar tylli kine ki jyla ki dang dei kiba hap ha kajuh ka ri.
Haba kren bad ki nongthoh khubor u Samla Lambokstarwell u la ong ba ka jingkam ka sorkar na ka por sha ka por ka ai daw ba ym lah shuh ban pynbeit biang ïa ki kyndon ba la ïasoi ha ka MoU ha kaba ïadei bad ka jingpynbeit biang ïa ki katto katne ki kyndon ki long kiba ym shong nia.
“Ka Meghalaya kam dei sha Pakistan bad ka Assam sha Bangladesh hynrei baroh ar jylla ki dang dei ki bynta ka ri India bad kam don jingeh ban pynbeit biang ïa ki kyndon kiba la ïasoi” u la ong.
Haba kylli pat kaei kab u don ban ong halor ka jingthet kti ka sorkar ba kane ka jingpynbeit pud kaba mynta ruh ka dei beit kat kum ka jingpruid dak ka sorkar kaba rim, u Samla Lambokstarwell u la ong ba na ka liang jong u um kwah ban long u nongjubab na ka bynta kino kino ki sorkar.
“Lada phi peit ka sorkar kaba synshar ha u snem 2011 ki dei ki juh hi kiba don ha ka bor ha kane ka kynti kaba mynta ruh” u la ong.
Haba la kylli pat kaei ka sienjam kin shim lada ka jingbym hun kan mih biang sa ha ka wat kaba ar jong ka jingpynbeit pud na ka liang jong u, u ong ba kin hap ban syllok bad ki trai jaka bad ki trai shnong bad ki hima kaei ka sienjam kaba kin shim namar ki dei ma ki kiba long ki trai ïa ki jaka puta.
Shuh shuh u la ong ba ka sorkar kam dei ban klet ba ki trai jaka bad ki hima ki dei kiba don ka hok nongkynti ïa ka khyndew ka shyiap bad kam dei ban shu leh lyndet ïa ki ha kano kano ka rai kaba ka shim.
Haba bynrap, u Pritam Arengh u President ka FKJGP Garo Hills Zone u la ïathuh ba na ka liang ki kynhun seng bhalangba ka jingdawa kaba ki buh ha khmat ka sorkar ka dei ban pynïoh biang ïa ki jaka ba kiba ju hap hapoh ka Hima Nonglang bad bad Nongbak-Aking kiba dei ki jong ka jylla Meghalaya namar kine ki jaka kim ju dei ruh kiba don ha ka jingiakajia pud.
U la ïathuh ruh ha ka jingshisha kine ki jaka kiba hap ha ka Hima Nonglang bad bad Nongbak-Aking kim don ha ka MoU bad ba ka jingbakla ka dei ha ka por ba dro ïa ka map kaba pynhap ïa ka Armalang, Malang Sarbari, Malang Joypur bad u la ïathuh ba na ka liang ka sorkar ka pynpaw ba kan pyrshang ban pynïoh biang ïa kine ki shnong.
U President ka FKJGP seng kmie u Bah Dundee Khongsit u la ong ba ka sorkar kam dei ban thet kti halor ka jingpynbeit pud namar lada ka sorkar kaba mynta ka lap ba ka don ka jingduna ha ka kaiphot jong u snem 2011 ka dei ka pali jong ka ban pynbeit ym ban shu mynjur matlah. Shuh shuh u la ong ba na ka liang ki kynhun seng bhaang ki la buh ruh ka jingkyrpad ba ka sorkar kan pyrshang dohïap doh im ban pynïoh biang ïa kito ki jaka kiba shah knieh ha ka Assam ha ka jingpynbeit pud ha ka wat kaba ar.