Nongpoh, Nailar 18: Namar ka jingjot rathai jong u surok bad shem jingeh jong ki paidbah haka leit ka wan, ki nongshong ka shnong Umling Sarang naduh ki longkmie, longkpa bad khun samla ryngkat bad ki dkhot ka FKJGP Umling Circle mynta ka sngi kila mih ban maramot ia utei u surok naka bynta ban pynsuk haka leit ka wan.
Ia katei ka jingmaramot ia utei u surok la pynlong ruh da ka seng FKJGP Umling Circle hapoh ka jingialam jong u Samla Banroy Wahlang hadien ka jingud jingnam jong ki paidbah nongshong shnong haka leit ka wan namar ka jingsniew palat jong u surok ba jngai tang kumba 1.5km.
U Samla Banroy Wahlang u la ong ruh ba kum ka seng ka dap da ka jingsngewkhia halor ka jingeh ba ki paidbah katei ka shnong ki mad haka leit ka wan namar ka jingjot rathai jong u surok, bad dei halor katei ka nongrim ba kum ka seng kala shim iaka sienjam ban pynlong da ka jingtrei sngewbha ban maramot ia utei u surok naka bynta ka jingbit jingbiang jong ki paidbah haka leit ka wan, bad kaba sngewkmen ka long ba naka liang ki paidbah jong katei ka shnong naduh ki longkmie longkpa ki mih ryntih ban snohkti lang bad ka seng ha katei ka sngi.
Naka liang ka seng kala kyrpad ruh sha ka sorkar ba ka dei ban phaikhmat sha katei ka shnong naka bynta ban pynioh surok rong ban pynsuk iaki paidbah haka leit ka wan bad ka kit ka bah.