Hadien kumba 40 snem urlong ka jingangnud ki paidbah ka thaiñ Mawhati

Nongpoh, Nailar 17: Hadien kumba 40 tylli ki snem ba ki paidbah ka thaiñ Mawhati ki mad jingeh haka leit ka wan namar ka jingsniew palat jong u surok bad ka jingïaid ap khmih lynti ban ïoh noh ïa u surok ba thymmai, katei ka jingangnud ki paidbah kan sa urlong noh shen hadien ba u Myntri Rangbah ka jylla u Conrad Sangma mynta ka sngi u la hiar sha Mawhati naka bynta ban buh ïa u mawnongrim naka bynta ban siang rong noh shen ïa utei u surok Umsning-Jagi Road.
Ïa utei u surok Mawhati ba dei ruh uwei naki surok ba shah kynthoh tam haka jylla, halor ka jingsniew shaba palat bad ka jingeh ba mad da ki paidbah la mang pisa haduh 83.38 klur lyngba ka Meghalaya Integrated Transport Project (MITP) bala bei pisa da ka World Bank ba jngai kumba 40.13 km ban sa sdang shuwa naduh Umsning haduh Sonidan haka sien ba nyngkong.
Ha katei ka sngi la sakhi lang da ka jingdonlang u Bah Dasakhiatbha Lamare MLA ka Mawhati ba dei ruh u Myntri ka tnad Transport ka jylla, Sosthenes Sohtun MLA ka Jirang, Bah Jason Sawkmie Mawlong MLA Umsning, Wailad Shylla MLA Jowai, u Rakesh Sangma Chairman GHADC, ka kong Macdalyne Mawlong MDC Umsning, u Bah Victor Ranee MDC Jirang, Bah TG Nengnong Secretary PWD, BP Marak CE (Standard) PWD (Roads) bad kiwei kiwei ki heh ophisar naka district bad ka tnad PWD.
Haba kren ha katei ka sngi naka liang u Bah Dasakhiatbha Lamare kum u MLA ka thaiñ u la pynpaw ka jingsngewkmen kaba khraw hadien 40 tylli ki snem ba ki paidbah ki mad jingeh haka leit ka wan pynban da ka jingshimkhia jong u kum u MLA bad ka sorkar MDA kaba don ka jingkitkhlieh naka bynta ki paidbah kumba u dei u surok ba kongsan eh, katei ka jingangnud jong ki paidbah kala urlong mynta ka sngi hadien bala lah ban buh mawnongrim ban siang rong noh ïa utei u surok kaba long ka jingkyrkhu kaba khraw ïa ki paidbah ka thaiñ Mawhati.
U la ong ruh ba u surok Mawhati u dei u ba shah kynthoh tam napdeng ki surok haka jylla bad dei na utei u surok ba ki paidbah ki ïoh ban kynthoh ïa u MLA ba u khlem trei khlem ktah haka thaiñ Mawhati ban klet noh ïa kiwei pat ki kam pynroi bala wanrah hapoh constituency.
Naka liang u Conrad Sangma kum u Myntri Rangbah ka jylla haba kren ha katei ka sngi u la ong ba jinglah ban plie ïa u mawnongrim naka bynta ban siang rong ïa u surok Umsning-Jagi Road kan long ka jingkyrkhu kaba khraw ïaki paidbah ka thaiñ kumba u dei u surok ba kongsan tam ha katei ka thaiñ ban pynïasoh ruh shaduh ka jylla Assam.
U la ong ruh ba utei u surok u dei u ba la shah ieh noh beiñ mynta la bun phew snem bad ka sien ba khatduh bala maramot ïa utei u surok ka dei haka por jong u Kpa jong u, u Purno A Sangma, hynrei kum u khun pat mynta u la ïoh ban bteng ïaka kam naka bynta ban siangrong thymmai syndon ïa utei u surok, kumba u dei u surok ba donkam ym tang ïaki paidbah ka thaiñ Mawhati hynrei ïaka jylla baroh kawei ban kyntiew ïaka ïoh ka kot bad ka roi ka par ki paidbah naduh ka khaii pateng bad ka jylla Assam.