Kin dang bun ki jingjia ba phylla shwa ka election MLA 2023 ong u nongïalam ka AITC

Shillong,Nailar 17 : U Nongïalam ka Liang Pyrshah uba dei ruh u nongïalam ka All India Tinamool Congress (AITC) u Dr Mukul Sangma ula ong mynta ka sngi Balang ba kin dang don bun ki jingjia ba phylla shwa ban poi sha ka election MLA 2023.
U la jubab kumne halor ka jingkylli ba uwei na ki MLA jongka AITC na Mawsynram u bah Himalaya Shangpliang u la rai ban leit pynïasoh noh sha ka BJP shwa ka election MLA.
“ Ki don bun kiei kiei ha ka jingim ki briew, ki don kiba shu kwah ban leit mad ja ne leit jngohkai ïa ki ïing ki sem ( party) jongkiwei. Hato ngam lah dep ïathuh ïa phi ha u snem ba la dep ym dei tang ka AITC hynrei na kiwei kiwei ki party ruh kan jia bad kiba kum kine kin dang ïai jia shuh shuh” ong u Dr Mukul.
U lao ng hadien kane ka dorbar Synrai ki paidbah kin sa ïohi bun kiei kiei ki ban jia la ka dei na ka NPP, UDP, HSPDP ne na kiwei kiwei ki seng saiñ pyrthei ruh.
U la ong shuh shuh ba ka AITC kam phai khmat tang sha ki MLA hynrei la dep kren shai ba ka dei ka party ka ban ailad ïa kiwei ki nongïalam khamtam ïaki samla kiba thrang ban shakri ïa ki paidbah da ka jingkut jingmut ban aiti lut lyngba ka saiñ pyrthei. Ka kloi ban pdiang bad ailad ïakito kiba don ka jingthrang ban sdang ïa ka jingiaid lynti jongki ha kane ka kam da kaba ïatrei lang bad ka party.