Shillong, Nailar, 16: Ka Khasi Authors Society (KAS) ka pynkhreh ban leit dawa beit markhmat na u Myntri Rangbahduh ka Ri, u Narendra Modi bad ruh na u Myntri Kampohiing ka Ri, u Amit Shah na ka bynta ban ithuh noh ïa ka Ktien Khasi ha ka Khyrnit kaba Phra jong ka Riti Synshar jong ka Ri.
“Ngin kyntu ïa ki ba kin rah noh da ka Bill ban pynrung noh ïa ka Ktien Khasi ha ka Khyrnit kaba Phra jong ka Riti Synshar jong ka Ri,” ong u President ka KAS, Dr. DRL Nonglait haba kren bad ki lad pathai khubor.
Katkum ka jingong jong u, lada ka sorkar pdeng ka shimkhia ban rah ïa kane ka Bill kata la pyntikan lypa ba kane kan long aiñ.
Shwa kane, u President ka KAS u la ong ruh ba lada ïa ka Citizenship (Amendment) Bill kaba la pyrshah da baroh ki jylla bad khamtam ha ka thaiñ la mynjur ha Parliament kumta na ka bynta ban pynrung ïa ka Ktien Khasi kan ym don satia ka jingpyrshah da kino kino ki sengsaiñ pyrthei.
Ha kajuh ka por u la ai khublei ruh ïa baroh ki sengsaiñ pyrthei kiba la rah ïa kane ka ishu ha Parliament ban kynthup noh ïa ka ktien Khasi bad Garo ha ka Khyrnit ba Phra.
“Kawei ka party hadien kawei pat na Meghalaya kiba don ki nongmihkhmat ha Parliament ki la rah ïa kane ka ishu,” bynrap biang u President ka KAS.
Shuh shuh u ong ruh ba mynshwa dei tang ki MP na ka jylla kiba kren halor katei ka ishu hynrei mynta pat wat ki MP na kiwei pat ki jylla ruh ki la kren lang ïa ka.
“Kaei kaba kham sngewtynnad ka long ba ki sengsaiñ pyrthei na kiwei ki jylla ruh ki la dawa lang ban kynthup ïa ka Ktien Khasi ha ka Khyrnit kaba Phra. Kumta kane ka la nang pynjur ïa ka jingdawa,” bynrap biang u Dr. Nonglait. Shuh shuh u ong ruh ba ka KAS bad ki Khasi baroh da kawei ka sur ki pynpaw ba baroh ki sengsaiñ pyrthei kiba don ha Meghalaya bad ha kiwei ki jaka lada ki kwah ba kane ka ishu kan urlong ki dei ban mih shakhmat ym ban pyrkhat eh tang na bynta ka jingmyntoi shimet.
“Ka thong jong ki kadei beit ban long ba ka Ktien Khasi kadei ban ïoh noh ïa ka jingithuh ha ka Khyrnit kaba Phra,” u la bynrap biang.
Shuh shuh u la kyntu ruh ïa ki 36 ngut ki MLA bad MPA na rilum Khasi bad Jaiñtia ba kin kyrshan lang ïa kane ka jingïakhun. “Kaba donkam eh ka long ba ym dei satia ban shu kren hynrei ban rah ruh da ka ‘private members bill’ halor kane ka ishu ha Parliament. Kane ka jingdawa kan nang kham jur,” u la ong da kaba bynrap ba dei tang kane ka lynti kaba lah ban pynurlong ïa ka mat jingdawa.
