Nongpoh, Nailar 16: Da ki hajar ngut ki paidbah na kylleng ka dong Ri-Bhoi hynnin ka sngi kila tuid sha madan NSCA Pahamsyiem naka bynta ban sakhi ïaka jingrakhe ïaka sngi laitluid ba 75 jong ka Ri India ïa kaba la rakhe hapdeng ka jingiphuh iphieng.
U Myntri ka tnad ki kam pynroi sha ki thaiñ Nongkyndong, u Bah Hamlet Dohling u la wan ban shim bynta kum u kongsan ban kyntiew ïaka lama lai rong jong ka ri bad ruh ban shim ïaka salute, haka jingdonlang u Bah Mayral Born Syiem MLA ka Nongpoh, u Arpit Upadhay Deputy Commissioner ka Ri-Bhoi, u Giri Prasad Superintendent of Police, bad kiwei kiwei ki heh ophisar naka district.
Kumba 27 tylli ki kynhun kila wan ban shim bynta haka parade ba kynthup naduh ka kynhun ki pulit ka Ri-Bhoi, ki skul bapher bapher, ki NCC, Bharat Scout and Guides bala pynphuh pynphieng ruh da ki jingrwai bad jingshad tynrai, ieid ri, ki skit bala shim bynta da ka kynhun jong ki skul bapher bapher ka them Ri-Bhoi.
Haba kren ha katei ka sngi naka liang u Bah Hamletson Dohling u la pynkynmaw ïaka jinglen lade jong ki khlawait kiba ieng haka nongrim jong ka jingïaleh khlem ka jingïaumsnam kum u Mahatma Gandhi, Jawaharlal Nehru, Sardar Vallabhai Patel bad Subhas Chandra Bose kiba lam lynti ban pynioh ïa ka ri synshar paidbah kaba khraw tam ha ka pyrthei bad ruh ka jingsarong ïa ki jingnoh synñiang jong ki khlawait ka jylla kum U Tirot Sing, U Kiang Nangbah bad Pa Togan Sangma kiba la aiti bad len lade na ka bynta ka jinglaitluid jong ngi naduh ki riewshlur na ka tnat shipai, paramilitary bad ki pulit kiba la phah ïa la ka jingim ban ïada ïa la u pud u sam, ban bat skhem ïa ka jinglong trai bad ban ïakhun pyrshah ïa ki kam lehnoh.
Ha katei ka sngi la ioh ruh ban sam ïaki khusnam bapher bapher naduh ki nongïalehkai kiba paw bad wanrah nam ïaka district, ki jaka sumar kiba la ai jingshakri ba paka ïaki paidbah, bad kiwei kiwei bad ruh la ioh ban sam ïaki khusnam sha ki skul kiba tbit bala shim bynta haka jinglehkai march pass.
