Shillong, Nailar, 12: U Myntri Rangbah ka Jylla u Conrad K Sangma ha ka sngi Thohdieng u la plie paidbah ïa Chief Minister’s Youth Centre ha ka shnong Chibra Agal kaba hap hapoh ka Rongram C&RD Block, West Garo Hills ha ryngkat ka jingsakhi lang jong u MLA u Thomas A Sangma.
Ka jingthmu jong kane ka Chief Minister’s Youth Centre ka long ban plie lad ïa ki samla na ki shnong nongkyndong jong ka jylla Meghalaya ba kin tip kumno ban sdang ïa ka jingïaid lynti ha kaba pynurlong ïa ki jingangnud jong ki, ban pynpaw pyrthei ïa ka sap ka phong kaba ki don, ban ïarap ïa ki ha kaba weng ïa ki jingeh ba ki ïohi sawdong jong ki.
Kane ka CMYC kan long kum ka shlem jong ki samla ka Jylla ba kin tip kumno ban ïoh jinghikai ha kaba ki lah ban jied ïa kaei kaba ki la ïoh jinghikai.
Ïa kane ka CMYC ba la shna pynwandur da ka Sauramandala Foundation and Project DEFY, yn sa buh ha ki bynta bapher bapher jong ka Jylla.
Haba kren kum u Kongsan u Myntri Rangabh u la ong ba ka Sorkar ka angnud ban wanrah sha ki samla ïa ki prokram bapher bapher bad ïa ki polisi.
U la bynrap ba ka jingshimkhia ban wanrah ïa ka CMYC kan sa nang ïarap shuh shuh ïa ka Sorkar ban sei ïa ki samla kiba angnud ban pynpaw ïa la ka sap ka phong kaba ki don.
U Myntri Rangbah u la ïathuh yn sa shna haduh 80 tylli ki CMYC hapoh ka Jylla baroh kawei.
