Shillong, Nailar 09: Ka sorkar jylla lyngba ka jingbthah ka Election Commission jong ka ri India, ka la bthah ba ki nongthep vote kidei ban pynïasoh ïa ki Electoral Photo Idendity Card (EPIC) bad u Aadhaar Number.
Kane ka long ka jingpynkylla ïa ka Registration of Electors Rule, 1960 and Conduct of Election Rule, 1961, kaba la wanrah da ka jingpynkylla ïa ki kyndon ha u snem baladep.
Kane ka jingpynkylla ïa ki kyndon jong ki nongthep vote lane kata ka amended electors rule ka ailad ïa ki nongthep vote ba kin pynïasoh ïa ki EPIC bad u Aadhaar Number haduh ka 1 tarik u ïaïong jong ka snem 2023. Hynrei uwei na ki ophisar jong ka Election Commission, u la ong pat ba kane kam dei kaba hap ban leh beit ne kaba long mandatory, hynrei ka shong ha ka jingmon jong ki paidbah.
Ha kajuh ka por ka sorkar ka bthah pat ba katkum ka Form 6B, ka sorkar ka bthah ba na ka bynta kito kiba ki bym don Aadhaar ki lah ban pynshisha da kiwei pat ki kot ki sla kum ki Pan Card, Job Card, Pass Book, Driving License, Smart Card Health Insurance bad kiwei kiwei ki kot donkam.
