Shillong, Nailar 09: Hadien katto katne sngi ba ka sorkar ka la pynkut noh ïa ka contract bad ka kompeni GVK kaba pynïaid ïa ka Emergency Service 108 namar ka jingïakhih ki nongtrei kiba hapoh ka lama jong ka Meghalaya EMRI Workers Union kiba la dawa ban weng noh ïa kane ka kompeni da kaba kynnoh ba ka don ka jingbamsap bad ka jingbym bym lah kane ka kompeni ban pynïaid hok ïa ka kam.
Ki katto katne ngut ki nongtrei ka Emergency service ki bym ïadon bynta lang bad ka MEMRIWU ba kynthup ïa ki nongñiah kali (Pilot), ki EMT ki ERO mynta ka sngi ki la pynpaw ïa ka jingbynñiaw hadien ba lah weng noh ïa katei ka kompeni namar ba ki la duh noh ïa ka kam kaba ki trei, bad ki la kyrpad ïa ka sorkar ba dei ban wanrah biang ïa ka Kompeni GVK.
Haba kren sha ki lad pathai khubor u samla S. Kharkongor u la kyntait ïa ka jingkynnoh ba ka don ka jingbamsap ha ka jingpynïaid jong ka GVK da kaba ong lada ka don kaba kum kata ka ka sorkar ka dei ban pynlong da ka jingtohkit
“Lada ka union ka ong ba ka GVK ka bamsap, ngi kyrpad ïa ka sorkar ba kan buh ïa ka jingtohkit kaba bniah halor ka jingkynnoh bamsap ïa ka GVK,” ong u samla S. Kharkongor.
Ha kaba ïadei bad ka jingbym mih jong ki ban kren ha ka por ba ka jingïakhih ka dang jur u Samla S Kharkongngor u la ong ba dei namar ba ki mih ki jingbyrngem na kiba bun ki liang bad dei na kata ka daw ki khlem nud eiei ban kren.
Kine ki nongtrei ki la pynpaw ruh ïa ka jingbym ïahap halor ka jingkynnoh jong ka MEMRIWU ba ka don ka Divide and Rule lanee pharia ban synshar, hapdeng ki para nongtrei.
“Ngim dei ba ngi don bynta lang bad ki nongpynïaid lane ba ki ong ma ki ban mih madan mynta, hynrei ka jingmih madan jong ngi kadei beit namar ba ngi kwah biang ïa ka kam,” La ong uwei na ki nongtrei.
Da kawei ka sur kine ki nongtrei ki la kyrpad ïa ka sorkar ba kadei ban wanrah biang ïa ka kompeni GVK, da kaba kdew ba kane ka kompeni kadei kaba lah pyntyllun ïa ka kam lah 13 snem mynta bad ba lada don kano kano ka jingduna ka sorkar ka dei ban bthah ban pynjanai ïa ka rukom ai jingshakri jong ka.
