Jowai, Nailar 09: Ka jingsahkut jong ki ñiut da ki bun bun sngi ha ki bynta jong ka Iawthymme Ladthadlaboh, Jowai kaba dei ka kawei na ka ïew hapoh ka jingpeit jong ka Jaiñtia Hills Autonomous District Council (JHADC), kaba la sdang biang ban buh jingeh ïa ki paidbah na ka jinglumthuh shi jaka ïa ki ñiut.
Na ka liang ka seng ki nongkhaïi jong ki trai jylla kaba la tip kum ka Jaiñtia Tribal Traders Association (JTTA) lyngba u President jong ka u ma Iatha Najiar kala pynpaw ka jingsngewkhia halor ka jingneh sah jong kitei ki ñiut khlem don shuh kiba leit kit ïa ki.
La ïathuh ba kane ka ïew ba la pyngïaid da ka J.H.A.D.C ïa ka bai dan lane ka kuna la dep ban siew da ki nongshong ïew sha ka Council man la ka sngi bad na ka liang ka Council ruh lyngba ka Market Department kala kyrpad ïa ki nongshong ïew ba kim dei ban bret pathar ïa ki ñiut ki ñier ha kane ka ïew bad na ka liang jong ki nongshong ïew ruh kila ai ïa ka jingïatreilang katba lah bad ka Council.
Ka seng kala buh jingkylli da kaba ong kat ka ïew “lah hi mo ban khang ïa ki nongthied nongpet, nongsiew nongtda ban nym pynmih ñiut satia” namar shisien ba la ong ka ïew ki ñiut ki ñier la tikna ba kin mih beit bad kumta ka donkam ban leit lum ïa ki manla ka sngi.
Ka seng ka buh ka jingkyrpad ïa ka Council kumjuh ïa ki bor District ba kin shimkhia ïa kane ka kam, khnang ban lait na ki jingpang ba har rukom lada kitei ki ñiut ka dang ïai neh slem ha katei ka jaka.
